اسلام آباد (نیوز ڈیسک) وزیر خزانہ سینیٹر اسحاق ڈار نے کہا ہے کہ سوئس اکاؤنٹس میں موجود رقم قوم کی امانت ہے ٗمعاملے کی تہہ تک پہنچنے کیلئے اپوزیشن کی طرف سے تعاون کا خیرمقدم کریں گے ٗہمارے خلوص پر کسی کو شک نہیں کرنا چاہئے۔ جمعہ کو سینٹ میں اظہار خیال کرتے ہوئے سوئس اکاؤنٹس میں 2 ارب ڈالر ہوں یا 200 ارب ڈالر، وہ قوم کی امانت ہیں۔ اپوزیشن کا کوئی رکن بھی اس معاملے کی طے تک پہنچنے کے لئے ہمارے ساتھ تعاون کرے گا تو اس کا خیرمقدم کریں گے۔ انہوں نے کہا کہ انہوں نے کابینہ کو سوئس اکاؤنٹس تک رسائی کے لئے سمری بھجوائی تھی اور پہلی بار کسی وزیر خزانہ نے یہ قدم اٹھایا ہے ٗکابینہ نے اس کی منظوری دی اور ایف بی آر کو اختیار دیا گیا کہ وہ سوئس حکام سے رابطہ کرے۔ اس سلسلے میں دو اجلاس اب تک ہو چکے ہیں تاہم ہم کسی ملک کو کارروائی جلد ہی آگے بڑھانے کے لئے مجبور نہیں کر سکتے۔ سوئس اکاؤنٹس میں 200 ارب ڈالر پاکستانیوں کے موجود ہونے سے متعلق خبر انہیں کسی اخبار سے ملی تھی ٗاس کا پورا انہیں بھی علم نہیں ہے تاہم ہمارے خلوص پر شک نہ کیا جائے۔ اب ہم ایک گلوبل سیٹ اپ کے بھی ممبر ہیں۔ اگر دوطرفہ طریقے سے اس معاملے پر پیشرفت تیزی سے نہیں ہوتی تو پھر کثیر جہتی ٹریک بھی استعمال کیا جا سکتا ہے تاہم ہمارے خلوص پر کسی کو شک نہیں کرنا چاہئے۔واضح رہے کہ گزشتہ روز قومی اسمبلی کو پارلیمانی سیکرٹری برائے خزانہ رانا افضل نے بتایاتھا کہ سوئس بینکوں میں 200ارب ڈالر پڑے ہوئے ہیں جبکہ اس سلسلے میں پاکستانی حکام کی سوئس حکام سے دو میٹنگز بھی ہوچکی ہیں ۔