لاہور(نیوزڈیسک) لاہور ہائیکورٹ کے جسٹس شاہد وحید نے پانامہ لیکس کی روشنی میں منی لانڈرنگ کرنے,اثاثے چھپانے پر وزیر اعظم میاں نواز شریف ،حسین نواز,حسن نواز,مریم نوازاور رحمن ملک و دیگر سیاسی شخصیات کو نااہل قرار دینے اور معاملے کی تحقیقات کے لئے دائر درخواست پر کارروائی کے لئے اس نو عیت کی تما م درخواستوں کو یکجا کرنے کا حکم دے دیا۔اور دائر درخواست پر مزید کارروائی 11 اپریل تک ملتوی کر دی۔عدالتی سماعت کے دوران تحریک انصاف کے رہنما گوہر نواز سندھو نے موقف اختیار کیا کہ پاناما لیکس سے یہ بات ثابت ہو گئی ہے کہ وزیر اعظم اور خاندان کے افراد نے غیر قانونی طور پر سرمایہ بیرون ملک منتقل کیا ہے، اس لیے نیب کو وزیر اعظم اور ان کے خاندان کے ارکان اور دیگر سیاسی شخصیات کے خلاف کارروائی کا حکم دیا جائے۔ درخواست گزار نے عدالت کو بتایا کہ اسی نوعیت کی مزید درخواستیں دائر کی گئی ہیں جس پر عدالت نے اس نو عیت کی تمام درخواستوںکو کو یکجا کرنے کا حکم دیا اور ہدایت کی کہ تمام درخواستوں پر 11 اپریل کو سماعت کی جائے گی۔