سکھر(نیوزڈیسک) پیپلز پارٹی کے سینیٹر اعتزاز احسن نے کہا ہے کہ آف شور کمپنی کالا دھن چھپانے کیلئے بنی ہوئی ہے ، پانامہ پیپرز سے دنیا میں تہکہ مچ گیا ہے اور شریف خاندان کو لگتا ہے کہ ہمارے خلاف سازش ہے ، حسین نواز نے اپنے اثاثوں کو الحمد اللہ کہہ کر قبول کیا جو اعتراف جرم ہے ۔ منگل کے روز سکھر میں میڈیا سے گفتگو کرتے ہوئے پیپلز پارٹی کے رہنما اعتزاز احسن نے کہا کہ وفاقی وزیر پرویز رشید نواز شریف کے کالا دھن چھپانے کیلئے جو بیان بازی کررہے تھے بیان دیتے وقت وہ شرمندہ لگ رہے تھے پانامہ پیپرز سے ابھی ایک فرم کے کاغذات سامنے آئے ہیں آنے والے دنوں میں شریف برادران کے غیر ملکی اثاثے بھی منظر عام پر آجائیں گے پرویز رشید شریف فیملی کے دفاع کیلئے جو بیان دے رہے ہیں وہ ان کی ڈیوٹی ہے ان کے لفظوں میں کوئی سچائی نہیں ہے ۔ انہوں نے کہا کہ آف شور کمپنی کرپشن اور ٹیکس کے پیسوں کو چھپانے کیلئے قائم کی جاتی ہے اگر خفیہ اور کالا دھن نہ ہو تو انسان اپنا مال آف شور کمپنی میں کیوں لگائینگے انہوں نے مزید کہا کہ پانامہ پیپرز کی دستاویزات سامنے آنے پر پوری دنیا میں تہلکہ مچ گیا ہے دنیا بھر میں حکومتوں نے پانامہ پیپرز میں نام آنے پر تحقیقات شروع کردی ہیں کسی نے اکیلے شریف خاندان کیلئے سازش نہیں کی حسین نواز نے اپنے اثاثوں کو الحمد اللہ کہہ کر قبول کیا جو اعتراف جرم ہے جرم کرنے کے بعد نیب کارروائی کرے ۔