اسلام آباد (نیوزڈیسک)وفاقی وزیرداخلہ چوہدری نثار علی خان کے حکم پر ہاؤس ہولڈ سروے کے دوران اسلام آباد کے تمام رہائشی علاقوں میں مقیم غیر ملکی افراد کے کوائف اکٹھے کرنے کا عمل مکمل ہو گیاہے ۔ وزارت داخلہ کے ترجمان کے مطابق سروے کے دوسرے مرحلے میں جمع شدہ ڈیٹا کی جانچ پڑتال اور تصدیق کا عمل جاری ہے تاکہ اس ڈیٹا کو سیکیورٹی کیلئے موثر طریقے سے استعمال کیا جا سکے۔ وزیرِ داخلہ نے ہاؤس ہولڈ سروے کے دوران اپنے کوائف نہ جمع کرانے والے 303گھروں میں رہائش پذیر غیر ملکیوں کو اپنے کوائف جمع کرانے کے لئے 16مارچ کی ڈیڈ لائن دی تھی جس کے بعد مذکورہ گھروں کے داخلی وخارجی راستے بند کرنے کے احکامات جاری کر دئیے گئے تھے۔ ڈیڈ لائن کے اختتام سے ایک گھنٹہ قبل ہی ان تمام غیر ملکیوں نے بھی اپنے کوائف مہیا کر دیے تھے جو گذشتہ کئی سالوں ں سے اس عمل سے گریزاں تھے۔ ترجمان نے کہاکہ کوائف مہیانہ کرنے یا لاپتہ ہونے والے غیر ملکیوں سے متعلق میڈیا کے بعض حلقوں میں آنے والے خبروں میں کوئی صداقت نہیں ۔واضح رہے کہ گزشتہ روز سے وفاقی دارالحکومت اسلام آبا دمیں پولیس کی جانب کوائف جمع کر انے کی ہدایت کے بعد 65 گھروں میں مقیم غیر ملکی شہری غائب ہونے کی خبریں آرہی ہیں۔محکمہ پولیس کے عہدیداران نے نجی ٹی وی کو بتایا کہ اسلام آباد کے 303 مکانات میں غیر ملکی کرائے پر رہائش پذیر تھے ٗپولیس نے ان میں سے 238 کرایہ داروں کی تفصیل حاصل کرلی تھی ٗ باقی کو 15 مارچ کی ڈیڈ لائن دی گئی تھی تاہم 65 مکانات میں رہنے والوں نے مقررہ تاریخ تک تفصیل فراہم نہیں کی اور گھر چھوڑ کر چلے گئے۔پولیس غیر ملکیوں کے نام ٗپتہ ٗ پاسپورٹ نمبر اور قومیت وغیرہ سے مکمل طور پر لاعلم ہے، جو یا تو وفاقی دارالحکومت کے ہی دوسرے علاقوں میں منتقل ہوگئے یا پھر شہر یا ملک ہی چھوڑ کر چلے گئے پولیس کے مطابق جب ان مکانات کے مالکان سے رابطہ کیا گیا تو انھوں نے کہا کہ اب یہ غیر ملکی یہاں نہیں رہتے ایک پولیس افسر نے نام ظاہر نہ کرنے کی شرط پر بتایا کہ اب ہمیں ان غیر ملکیوں کے نام، قومیت اور پاسپورٹ نمبر کے حوالے سے کوئی معلومات نہیں ہیں تو ان کے ٹھکانے کا سراغ لگانا ناممکن ہے۔پولیس حکام نے بتایا کہ غیر ملکیوں کی اپنی شناخت ظاہر کیے بغیر وفاقی دارالحکومت میں رہائش اختیار کرنے کی وجوہات کا بھی اب تک علم نہیں ہوسکا۔