لاہور(نیوز ڈیسک)امیر جماعت اسلامی سینیٹر سراج الحق کا کہنا ہے کہ حکمرانوں کا قبلہ واشنگٹن اور قوم کا مکہ مکرمہ ہے، وزیراعظم کی طرف سے سیکولر پاکستان کا نعرہ ملک کی سا لمیت اور یکجہتی سے کھیلنے کے مترادف ہے، حکمرانوں کو خبردار کرتے ہیں کہ ملک کی اسلامی شناخت کے خلاف سازشیں چھوڑ دیں۔منصورہ میں نظام مصطفیٰ کانفرنس سے خطاب کرتے ہوئے سراج الحق نے کہا کہ بلاول بھٹو زرداری نے اسلامی تحریکوں کو کچلنے کیلئے سیکولرجماعتوں کو متحد ہونے کی دعوت دی ہے، اب غلامان اوباما اور غلامان مصطفی کے درمیان مقابلہ ہوگا، ملک میں غلبہ اسلام کیلئے کوشاں کوئی جماعت نواز شریف کا ساتھ نہیں دے سکتی۔سراج الحق نے کہا کہ  بنلگہ دیش میں پھانسیوں پر جھولنے والے ہمارے قائدین نے اسلام او رپاکستان کیلئے جانیں قربان کیں، نواز شریف کوقائد اعظم سے بے وفائی اور عالمی استعمار سے وفاداری کا رویہ ترک کرنا پڑے گا، پاکستان کے نظریاتی تشخص کی حفاظت کیلئے کسی قربانی سے دریغ نہیں کریں گے۔