راولپنڈی ( نیوزڈیسک) اسلام آباد بینظیر انٹرنیشنل ایئرپورٹ پر مشہور نعت خواںجنید جمشید پر حملہ کرنے والوں کی شناخت کر لی گئی ہے جو ممتاز قادری کے چہلم میں شرکت کیلئے راولپنڈی آئے تھے۔پولیس نے گرفتاری کے لیے (نادرا) کی مدد سے ان افراد کے کوائف کی تصدیق کر لی۔ ایک نجی ٹی وی کی رپورٹ کے مطابق تفتیشی افسر سب انسپکٹر راجا ارشد نے بتایا کہ جنید جمشید کی نشاندہی پر 3افراد کو شاہ فیصل، عرفان اور اختر کے نام سے شناخت کر لی گئی ہے اور پولیس ان کے گھروں کے پتے کا تعین کر چکی ہے۔پولیس کی ایک ٹیم کو بھیجا جائے گا تا کہ انہیں الزامات کا سامنا کرنے کے لیے راولپنڈی لایا جا سکے۔ سب انسپکٹر راجا ارشد کے مطابق مطلوبہ ملزمان کا تعلق کراچی سے ہے جو ممتاز قادری کے چہلم میں شرکت کے لیے راولپنڈی آئے تھے۔