لاہور( نیوز ڈیسک) ہیڈ کوچ وقار یونس کی پی سی بی کو پیش کی گئی رپورٹ کے مد نظر رکھتے ہوئے حکام نے اہم اقدام اٹھانے کا فیصلہ کیا ہے۔نجی میڈیا نے اپنے ذرائع کے حوالے سے بتایا کہ پی سی بی نے ہیڈ کوچ وقار یونس اور کپتان آفریدی کو فارغ کرنے کا فیصلہ کیا ہے۔ ذرائع کے مطابق ٹی ٹوئنٹی کی کپتانی کے لیے سرفراز احمد اور شعیب ملک کے ناموں پر غور کیا جارہا ہے، جبکہ عاقب جاوید اور معین خان کو منیجمنٹ میں اہم عہدے ملنے کا امکان ہے۔ ناقص کار کردگی کے سبب عمر اکمل اور احمد شہزاد کے خلاف پی سی بی کی طرف سے سخت ایکشن لیا جائےگا۔ مزید براں پی سی بی کی فیکٹ فائنڈنگ کمیٹی نے ڈاکٹر سہیل سلیم کو طلب کر لیا ہے جن سے محمد حفیظ کی انجری سے متعلق پوچھ گچھ کی جائے گی۔ ذرائع کا کہنا ہے کہ فیکٹ فائنڈنگ کمیٹی آئندہ چند روز میں اپنے فیصلے سے باضابطہ طور پر آگاہ کرے گی ۔