دبئی (نیوز ڈیسک)انگلینڈ اینڈ ویلز کرکٹ بورڈ کے سابق چیئرمین جائلز کلارک اور آئی سی سی کے چیف ایگزیکٹیو ڈیو رچرڈسن آئندہ ماہ پاکستان کا دورہ کریں گے۔ میڈیا رپورٹس کے مطابق جائلز کلارک پاکستانی کرکٹ کیلئے آئی سی سی کی قائم کردہ ٹاسک فورس کے سربراہ ہیں۔ان کے دورے کا مقصد انٹرنیشنل الیون کے دورہ پاکستان کی تفصیلات طے کرنا ہے۔یہ دورہ پاکستان میں انٹرنیشنل کرکٹ کی بحالی کا حصہ ہے ‘انٹرنیشنل الیون کا یہ دورہ اس سال پاکستانی ٹیم کے دورہ انگلینڈ کے بعد متوقع ہے۔واضح رہے کہ پاکستان کرکٹ بورڈ ملک میں انٹرنیشنل کرکٹ کی بحالی کیلئے کوشاں ہے۔ اگرچہ زمبابوے کی ٹیم پاکستان کا دورہ کرچکی ہے لیکن ابھی تک کسی بڑی ٹیم نے پاکستان آنے پر آمادگی ظاہر نہیں کی۔جائلز کلارک اپنے دورے میں انٹرنیشنل الیون کے دورے کی تفصیلات طے کریں گے۔