لاہور( نیوزڈیسک )بھارت کا تکبر،پاکستانی ٹیم کی شکست،عمران خان کے برطانوی نشریاتی ادارے کوانٹرویو پرنیاتنازعہ شروع، بھارتی ٹی وی چینلز نے عمران خان کے بیان کو جواز بناکر نئی مہم شروع کردی، سابق بھارتی کھلاڑی تنقید میں پیش پیش ہیں، تفصیلات کے مطابق تحریک انصاف کے سربراہ و قومی کرکٹ ٹیم کے سابق کپتا عمران خان نے کہا ہے کہ پاک بھارت دوطرفہ کرکٹ سیریز کو یقینی بنانے کے لیے بھارت کو اپنا مثبت کردار ادا کرنا چاہیے،پاک بھارت دوطرفہ سیریز کا انعقاد بہت ضروری ہے، یہ ایک بڑی کرکٹ ہے جس کا فائدہ دونوں کرکٹ بورڈز کو ہوگا۔برطانوی نشریاتی ادارے کو انٹر ویو میں عمران خان نے کہا کہ بھارتی کرکٹ بورڈ پہلے ہی مالی طور پر مستحکم ہے لیکن زیادہ فائدہ پاکستان کی کرکٹ کو ہوسکتا ہے اور اس سے جو بھی پیسہ آئے گا وہ پاکستان کی ڈومیسٹک کرکٹ کو بہتر بنانے پر کام آسکتا ہے۔عمران خان نے کہا کہ پاکستان نے دو طرفہ سیریز کے لیے ہمیشہ مثبت سوچ رکھی ہے اور قدم بڑھایا ہے لیکن بھارت نے اس کا جواب مثبت نہیں دیا ۔چونکہ وہ ایک طاقتور ملک ہے لہٰذااس میں تکبر کا عنصر بھی نمایاں ہے اور وہ اس معاملے میں رکاوٹ بنا ہوا ہے۔عمران خان نے کہا کہ بھارت کو آگے قدم بڑھانا چاہیے۔ پاکستان اور بھارت کے درمیان کرکٹ کھیلنے سے دوریاں ختم ہوں گی اور دوستی بڑھے گی۔عمران خان نے بھارت کے خلاف پاکستانی ٹیم کی شکست پر مایوسی ظاہر کرتے ہوئے کہا کہ پاکستانی ٹیم نے اپنے ٹیلنٹ سے انصاف نہیں کیا،اگر یہ شکست مقابلہ کرکے ہوتی تو دکھ نہیں ہوتا لیکن یہ مقابلہ یکطرفہ رہا جو مایوس کن ہے۔