صدر براک اوباما پہلے امریکی صدر ہیں جنھوں نے بھارت کی یوم جمہوریہ کی تقریب میں شرکت کی ہے۔
وہ ان دنوں تین روزہ دورے پر بھارت میں ہیں جسے دونوں ممالک کے درمیان تعلقات میں گرمجوشی کی علامت طور پر دیکھا جا رہا ہے۔
اتوار کو دونوں ممالک نے سول جوہری معاہدے کے ضمن میں پیش رفت کی، جس کے تحت اب امریکی کمپنیاں بھارت کو غیرفوجی جوہری ٹیکنالوجی فراہم کر سکیں گی۔
بھارتی وزیر اعظم نریندر مودی نے اسے دونوں ممالک کے درمیان ’تعاون کے نئے سفر‘ سے تعبیر کیا ہے۔
یومِ جمہوریہ کی پریڈ کا معائنہ کرنے کے بعد صدر براک اوباما حزب اختلاف کانگریس پارٹی کے رہنماؤں سے ملاقات کریں گے۔ اس کے علاوہ ایک تجارتی کانفرنس سے بھی خطاب کریں گے۔
واضح رہے کہ 26 جنوری کو بھارت اپنا 65واں یوم جمہوریہ منا رہا ہے۔ سنہ 1950 میں اسی دن بھارت نے برطانیہ سے آزادی کے تقریبا تین سال بعد نیا آئین اپنایا تھا۔
یہ تقریب ہر سال انڈیا گیٹ کے پاس کنگز ایوینو یا راج پتھ پر ہوتی ہے۔
اس بار کہرے اور ہلکی بارش کے درمیان یہ تقریب ہوئی جس میں پہلی بار بھارت کی تینوں افواج بری، بحری اور فضائیہ کی خواتین دستوں نے شرکت کی۔
اس میں بھارت کی قوت اور جوہری میزائل سمیت تازہ ترین اسلحوں کی نمائش کی جاتی ہے جن میں روسی ساخت کے اسلحوں کے ساتھ امریکہ سے خریدے اسلحے بھی شامل تھے۔
ہیلی کاپٹروں سے وہاں موجود لوگوں پر پھولوں کی پنکھڑیوں کی بارش کی گئی۔ اور رقص کرتے ہوئے بینڈ ناظرین کے سامنے سے گزارے گئے۔
اس موقعے پر مختلف ریاستوں کے فلوٹ نکالے جاتے ہیں جو وہاں کی تاریخی وراثت کے عکاس ہوتے ہیں۔
پریڈ دیکھنے والوں میں شامل ایک طلبہ اجیت کمار نے کہا: ’یہ دن حب الوطنی کا دن ہے اور میں خوش قسمت ہوں کہ میں اس کا حصہ ہوں۔ سچ تو یہ ہے کہ اوباما جیسے مہمان کی موجودگی نے اسے مزید خاص بنا دیا ہے۔‘
اس دوران بہادری کے انعامات بھی دیے جاتے ہیں۔ اس سے قبل اس موقعے پر مختلف قسم کے سرکاری اعزازات کے اعلان کیے جاتے ہیں جن میں بھارت رتن، پدم ویبھوشن، پدم بھوشن اور پدم شری وغیرہ شامل ہیں۔
صدر اوباما کے دورے میں دونوں ممالک نے دو طرفہ تجارت کو پانچ گنا بڑھانے کا عہد کیا ہے۔ ابھی تک یہ ایک کھرب ڈالر سالانہ ہے۔ اس کے علاوہ دونوں ممالک نے دفاعی منصوبوں میں بھی تعاون قائم کرنے کا عہد کیا ہے۔
صدر اوباما نے سعودی عرب کے شاہ عبداللہ کے انتقال کی وجہ سے اپنا بھارت دورہ مختصر کر دیا ہے اور اب وہ تاریخی تاج محل کا دیدار نہیں کر سکیں گے۔
