لاہور(نیوز ڈیسک) حکومت پنجاب نے رواں مالی سال2015۔16 کے دوران صوبائی محکمہ پلاننگ اینڈ ڈویلپمنٹ کی صوبائی ڈویلپمنٹ ورکنگ پارٹی کے19 ویں اجلاس میں مختلف ڈویلپمنٹ سیکٹرز کی کل 4ترقیاتی سکیموں کو مکمل کرنے کے لیے مجموعی طور پر 3 ارب 89 کروڑ 75 لاکھ 58ہزار روپے کی منظوری دیدی۔ صوبائی ڈویلپمنٹ فورم کے اجلاس کی صدارت چیئر مین پلاننگ ایند ڈویلپمنٹ پنجا ب محمدجہانزیب خان نے کی جبکہ متعلقہ صوبائی محکمہ جات کے اعلی افسران اور پنجاب پلاننگ اینڈ ڈویلپمنٹ بورڈ کے ممبران نے شرکت کی۔صوبائی ورکنگ پارٹی کے19 ویں اجلاس میں جن4ترقیاتی منصوبہ جات کی منظوری دی گئی ان میں ضلع خانیوال میں اقبال نگر تا ڈھلواں روڈ لمبائی 26 کلومیٹر کی کشادگی و بہتری کیلئے 35 کروڑ 58 لاکھ 21 ہزار روپے، ضلع رحیم یار خان میں عربی ٹبہ کے مقام پر مہران پورکے نزدیک دریائے انڈس کے اوپر بل کی تعمیر کیلئے 3 ارب 1 کروڑ 57 لاکھ 85 ہزار روپے، ضلع ملتان میں جمیلہ آباد تا ملتان ائیر پورٹ روڈ لمبائی 1.13 کلومیٹر کی تعمیر کیلئے 29 کروڑ 19 لاکھ 47 ہزار روپے اور ضلع لاہور میں ڈونگی گراؤنڈ ایم ایم عالم روڈ کے مقام پر تفریح پارک بنانے اور بیسمنٹ میں کار پارکنگ کی تکمیل کیلئے 23 کروڑ40 لاکھ 5 ہزار روپے شامل ہیں۔