اب اصل ٹوکن رسید کے بغیر بھی درخواست گزار خود کارڈ وصول کرسکے گا،
قریبی رشتے دار اور شریک حیات بھی مخصوص شرائط کے تحت مجاز
کراچی(این این آئی) نیشنل ڈیٹا بیس اینڈ رجسٹریشن اتھارٹی (نادرا) نے شہریوں کی سہولت کیلئے تیار شدہ قومی شناختی کارڈ وصول کرنے کے قواعد میں آسانی کردی۔نادرا کے مطابق درخواست گزار اصل ٹوکن رسید کے ساتھ یا اس کے بغیر بھی اپنا شناختی کارڈ خود وصول کرسکتا ہے۔اصل ٹوکن رسید موجود ہونے کی صورت میں درخواست گزار کے خون کے رشتے دار یا شریک حیات بھی شناختی کارڈ وصول کرسکتے ہیں۔
تاہم اگر اصل ٹوکن رسید موجود نہ ہو تو خون کے رشتے دار یا شریک حیات کو اپنا شناختی کارڈ اور درخواست گزار کا تحریری اجازت نامہ پیش کرنا ہوگا۔نادرا کے مطابق کوئی بھی شناختی کارڈ ہولڈر اصل ٹوکن رسید اور درخواست گزار کے تحریری اجازت نامے کے ساتھ کارڈ وصول کرسکتا ہے۔نادرا نے مزید بتایا کہ پاک آئی ڈی موبائل ایپ کے ذریعے دی گئی درخواستوں کے شناختی کارڈ اندرون اور بیرون ملک بذریعہ کوریئر گھر کے پتے یا قریب ترین نادرا مرکز پر بھی منگوائے جاسکتے ہیں۔
