اسلام آباد (نیوز ڈیسک) حج 2027 کی تیاری کرنے والے اوورسیز پاکستانیوں کے لیے حکومت نے پہلے پاکستانی پاسپورٹ کے حصول کا عمل تیز کرنے کا فیصلہ کیا ہے۔
ڈائریکٹر جنرل امیگریشن اینڈ پاسپورٹس محمد علی رندھاوا نے ڈی جی انٹیلیجنس بیورو فواد اسد اللہ خان سے مشاورت کے بعد دوہری شہریت رکھنے والے پاکستانی حجاج کی سیکیورٹی کلیئرنس جلد مکمل کرنے کی ہدایات جاری کردی ہیں۔
اس حوالے سے دنیا بھر میں قائم پاکستانی سفارتخانوں اور مشنز کو باقاعدہ سرکلر بھی ارسال کردیا گیا ہے، جس کے تحت حج کے لیے پاسپورٹ بنوانے والے اوورسیز پاکستانیوں کی درخواستوں پر سیکیورٹی کلیئرنس کا عمل تیز کیا جائے گا۔
پاسپورٹ حکام نے حج درخواست گزاروں کے لیے خصوصی فارم بھی متعارف کرایا ہے۔ متعلقہ افراد اپنی ضروری معلومات مکمل کرکے یہ فارم پاسپورٹ درخواست کے ساتھ پاکستانی سفارتخانے میں جمع کراسکیں گے، تاکہ درخواست کی کارروائی جلد مکمل ہوسکے۔
حکام کے مطابق اس اقدام کا مقصد حج 2027 کے خواہشمند اوورسیز پاکستانیوں کو بروقت پاسپورٹ فراہم کرنا ہے، کیونکہ پہلے پاسپورٹ کے لیے درکار سیکیورٹی کلیئرنس میں کئی ماہ لگنے کے باعث درخواست گزاروں کو مشکلات کا سامنا کرنا پڑتا تھا۔
واضح رہے کہ تقریباً دو ہفتے قبل چیئرمین اوورسیز پاکستانیز ویلفیئر کونسل نعیم نقشبندی نے اسلام آباد میں ڈی جی امیگریشن اینڈ پاسپورٹس محمد علی رندھاوا سے ملاقات کی تھی، جس میں سمندر پار پاکستانیوں کو درپیش مسائل اور ریاست و اوورسیز پاکستانیوں کے درمیان رابطہ مزید بہتر بنانے سمیت مختلف امور پر گفتگو ہوئی تھی۔
حکام کے مطابق پہلے پاکستانی پاسپورٹ کی سیکیورٹی کلیئرنس میں تیزی کی یہ خصوصی سہولت حج 2027 کے لیے سفر کرنے کے خواہشمند افراد تک محدود ہوگی۔
