اسلام آباد (نیوز ڈیسک) فرانس کے معروف سیاحتی مقام سینٹ ٹروپے میں ایک غیر ملکی سیاح سے انتہائی قیمتی گھڑی چھیننے کے الزام میں پولیس نے چار مشتبہ ہسپانوی شہریوں کو حراست میں لے لیا۔
فرانسیسی حکام کے مطابق واقعہ ریویرا کے سیاحتی علاقے سینٹ ٹروپے میں پیش آیا، جہاں برازیل سے تعلق رکھنے والے ایک سیاح کو تقریباً 3 لاکھ ڈالر مالیت کی گھڑی سے محروم کردیا گیا۔ واقعے کی اطلاع ملنے کے بعد پولیس نے فوری کارروائی شروع کی۔حکام کا کہنا ہے کہ واردات کے بعد مشتبہ افراد ایک گاڑی کے ذریعے فرار ہوگئے تھے، تاہم پولیس نے دستیاب شواہد کی مدد سے ان کا سراغ لگا کر قریبی قصبے کوگولین سے گرفتار کرلیا۔پولیس کے مطابق کارروائی کے دوران مبینہ طور پر چوری کی گئی گھڑی بھی برآمد کرلی گئی ہے، جسے قانونی کارروائی مکمل ہونے کے بعد متاثرہ سیاح کے حوالے کیا جائے گا۔فرانسیسی حکام کے مطابق سینٹ ٹروپے دنیا بھر کے مالدار افراد کی توجہ کا مرکز ہے، جس کے باعث قیمتی اشیا پر نظر رکھنے والے جرائم پیشہ عناصر بھی اس علاقے میں سرگرم رہتے ہیں۔
بعض ملزمان سیاحوں کا روپ دھار کر وہاں پہنچتے اور دولت مند افراد کو نشانہ بناتے ہیں۔پولیس نے بتایا کہ رواں سیاحتی سیزن کے آغاز سے اب تک سینٹ ٹروپے کے علاقے میں تقریباً 15 مہنگی گھڑیاں چوری ہونے کی رپورٹس سامنے آچکی ہیں، جس کے بعد قیمتی اشیا رکھنے والے سیاحوں کی سکیورٹی پر بھی خصوصی توجہ دی جا رہی ہے۔
