لاہور(آن لائن)این اے 122 کے ضمنی الیکشن کے بعد بننے والے سیاسی ماحول نے نیا رخ اختیار کر لیا ہے۔ضمنی الیکشن کے بعد پی ٹی آئی سے انتہائی کم مارجن سے جیتنے والے حلقہ این اے 122 سے نومنتخب ایاز صادق کو اپنے سابقہ پوزیشن سنبھالنے کےلئے نئی رکاوٹوں کا سامنا ہے۔سیاسی حلقوں کے مطابق پاکستان مسلم لیگ ن کی طرف سے سپیکر قومی کےلئے تین سے پانچ اراکین اسمبلی کے نام سامنے آئے ہیں جن میں سے سابق وزیر قانون و دفاع زاہد حامد”فیورٹ لسٹ“ میں سرفہرست ہیں اور خیال کیا جا رہا ہے کہ سپیکر قومی اسمبلی انکومنتخب کرلیا جائیگا۔ قومی اسمبلی کے نئے سپیکر کے انتخاب کےلئے اجلاس 6 نومبر کو منعقد ہوگا جس کےلئے پاکستان مسلم لیگ ن نے اپنے تمام ارکان قومی اسمبلی اور اتحادی جماعتوں کے ممبران کو 6 نومبر کو اسمبلی اجلاس میں یقینی بنانے کی ہدایت کر دی ہے۔جبکہ دوسری طرف سینئر سیاسی تجزیہ کاروں کے مطابق پیپلز پارٹی سمیت دیگر اپوزیشن جماعتیں پاکستان تحریک انصاف کے امیدوار کی حمایت کر سکتیں ہیںتاہم پی ٹی آئی نے تمام ایم این اےز اور اپوزیشن جماعتوں کے سربراہوں سے رابطہ کےلئے کمیٹی تشکیل دے دی ہے۔