لاہور/سیالکوٹ/فیصل آبا(نیوزڈیسک) بھارت میں شیوسینا کی غنڈہ گردی کیخلاف پاکستان کے کئی شہروں میں احتجاجی مظاہرے کئے گئے اور ہندو انتہا پسندوں کیخلاف نعرے لگائے گئے ، شائقین کرکٹ نے مطالبہ کیا ہے کہ آئی سی سی ٹی ٹونٹی کے مقابلوں کو بھارت کی بجائے پاکستان میں منتقل کرے ۔ تفصیلات کے مطابق کرکٹ شائقین نے بھارتی شدت پسند تنظیم شیو سینا کی طرف سے پی سی بی کے چیئرمین شہریار خان اوربی سی سی کے صدر کی ملاقات کے دوران دھاوا بولنے کے اقدام کی شدید مذمت کرتے ہوئے احتجاجی مظاہرے کئے ، شرکاء نے شدت پسند تنظیم شیوسینا اور بھارتی حکومت کے خلاف شدید نعرے لگاتے ہوئے مطالبہ کیا کہ ٹی ٹونٹی ورلڈ کپ کے مقابلے بھارت کی بجائے پاکستان میں منتقل کئے جائیں ۔لاہور میں کرکٹ شائقین نے قذافی اسٹیڈیم کے باہر احتجاجی مظاہرہ کیا جس میں شرکاء نے بھارتی انتہا پسند تنظیم شیوسینا اور بھارتی حکومت کے خلاف نعروں پر مبنی بینرز اور پلے کارڈز بھی اٹھا رکھے تھے ۔ نارنگ منڈی ، کوٹ مومن ، سیالکوٹ ، فیصل آباد ، گوجرانوالہ سمیت دیگر مختلف مقامات پر بھی کرکٹ شائقین نے بھارتی انتہا پسند تنظیم کے اقدام کے خلاف شدید احتجاج کیا اور آئی سی سی سے مطالبہ کیا کہ پاکستان میں سکیورٹی کی صورتحال میں بہتری کے باعث ٹی ٹونٹی ورلڈ کپ کے مقابلے بھارت کی بجائے پاکستان میں منتقل کئے جائیں ۔ سوشل میڈیا پر اپنے رد عمل کا اظہار کرتے ہوئے کرکٹ شائقین کا کہنا تھاکہ پی سی بی کو بھی اب بھارت کے پیچھے پیچھے بھاگنے کی بجائے سخت موقف اپنانا چاہیے اور اس معاملے کو آئی سی سی کے سامنے اٹھایا جائے ۔ بھارت اچھی طرح جانتا ہے کہ ان کی کرکٹ ٹیم پاکستانی ٹیم کا مقابلہ نہیں کر سکتی اور تشدد اور میں نہ مانوں کی رٹ لگا کر میدان سے راہ فرار اختیار کی جارہی ہے۔ مظاہرین کا کہنا تھا کہ بھارتی انتہا پسند تنظیم شیوسینا کی جانب سے پی سی بی چیئرمین کو دھمکیاں دینے کے عمل اور مسلمانوں کا قتل عام کی جتنی مذمت کی جائے کم ہے، انتہا پسند ہندوؤں نے بھارت میں مسلمانوں کا جینا مشکل کر دیا ہے۔