اسلام آباد (نیوز ڈیسک)دنیا بھر میں قیمتی پھلوں کی فہرست میں شامل جاپانی آم “میازاکی” اب پاکستان میں بھی اگایا جا رہا ہے، جو اپنی بے مثال مٹھاس اور انوکھے رنگ کی وجہ سے پہچانا جاتا ہے۔ یہ آم بین الاقوامی مارکیٹ میں 800 سے 900 امریکی ڈالر فی کلو میں فروخت ہوتا ہے، جو پاکستانی کرنسی میں تقریباً ڈھائی سے تین لاکھ روپے بنتے ہیں۔

اس نایاب آم کی خاص بات اس کا گہرا سرخ اور جامنی رنگ، بغیر ریشے کا نرم گودا، اور خوشبودار ذائقہ ہے، جس کی بدولت اسے “دھوپ کا انڈہ” یا “ڈائناسور کے انڈے” جیسے دلچسپ نام بھی دیے گئے ہیں۔اب یہ قیمتی پھل کراچی کے علاقے ملیر، خاص طور پر میمن گوٹھ میں کاشت کیا جا رہا ہے۔ مقامی کسان غلام ہاشم نورانی نے جاپان سے میازاکی آم کا پودا منگوایا تھا۔ انہوں نے بتایا کہ کراچی کے موسمی حالات میں اس پودے کی خصوصی نگہداشت کی گئی، جس کا نتیجہ یہ نکلا کہ اب یہ پودا پھل بھی دے رہا ہے۔یہ دوسرا سال ہے کہ غلام ہاشم کو میازاکی آم کی فصل حاصل ہوئی ہے۔ ان کے مطابق، رواں سیزن میں وہ یہ آم تین لاکھ روپے فی کلو تک فروخت کرنے کا ارادہ رکھتے ہیں۔پاکستان میں میازاکی آم کی کاشت مقامی مارکیٹ کے لیے تو خوش آئند ہے ہی، لیکن اس کی برآمد کے مواقع بھی پیدا ہو چکے ہیں، جو ملکی زرِ مبادلہ میں اضافے کا ذریعہ بن سکتے ہیں۔