اسلام آباد (نیوز ڈیسک)پاکستان سپر لیگ سیزن 10 کا رنگا رنگ میلہ ایک مرتبہ پھر راولپنڈی میں سج گیا ہے، جہاں کرکٹ کے دیوانوں کی بڑی تعداد اسٹیڈیم کا رُخ کر رہی ہے۔ میچ کے آغاز سے قبل قومی یکجہتی اور حب الوطنی کے مناظر نے سماں باندھ دیا۔راولپنڈی کرکٹ اسٹیڈیم میں میچ شروع ہونے سے پہلے وطن کے لیے جانیں قربان کرنے والے شہداء کو خراج عقیدت پیش کیا گیا۔

ان عظیم قربانیوں کی یاد میں ایک منٹ کی خاموشی اختیار کی گئی، جب کہ اسٹیڈیم قومی پرچموں اور “پاکستان زندہ باد” کے نعروں سے گونج اٹھا۔ قومی ترانہ نہایت جوش و جذبے سے پڑھا گیا، جس کے بعد دلکش آتش بازی کا مظاہرہ بھی کیا گیا۔پہلی اننگز مکمل ہونے کے بعد منعقدہ خصوصی تقریب میں پاکستان کے سپہ سالار، چیف آف آرمی اسٹاف جنرل سید عاصم منیر اسٹیڈیم پہنچے۔

اس موقع پر ڈی جی آئی ایس پی آر لیفٹیننٹ جنرل احمد شریف چوہدری اور چیئرمین پی سی بی محسن نقوی بھی ان کے ہمراہ موجود تھے۔تقریب کے میزبان حمزہ علی عباسی نے اس موقع پر اعلان کیا کہ پاکستان سپر لیگ کے آئندہ تین روز مسلح افواج کے نام کیے گئے ہیں۔ ان کے مطابق پہلا دن پاک فوج، دوسرا دن پاک بحریہ اور تیسرا دن پاک فضائیہ کے نام سے منسوب ہوگا۔اس طرح پی ایس ایل نہ صرف کرکٹ کا تہوار بن چکا ہے بلکہ قومی اتحاد اور مسلح افواج کے ساتھ اظہارِ یکجہتی کا ایک خوبصورت مظہر بھی بن کر سامنے آیا ہے۔