اسلام آباد (نیوز ڈیسک)بھارتی کرکٹ ٹیم کے سابق کپتان مہندرا سنگھ دھونی اس وقت تنقید کی زد میں ہیں کیونکہ انہوں نے پہلگام واقعے پر کوئی ردعمل ظاہر نہیں کیا، جس پر بھارتی حلقوں کی جانب سے سخت اعتراض سامنے آیا ہے۔

پہلگام حملے کے بعد متعدد بھارتی کرکٹرز، جن میں ویرات کوہلی، شبمن گل اور پاکستان مخالف مؤقف رکھنے والے سابق کرکٹر دانش کنیریا شامل ہیں، واقعے پر اظہار افسوس کر چکے ہیں۔ تاہم دھونی کی خاموشی سوشل میڈیا صارفین اور بعض ناقدین کو ناگوار گزری ہے۔

سوشل میڈیا پر بعض صارفین نے دھونی پر تنقید کرتے ہوئے سوال اٹھایا کہ کیا ایک سابق فوجی افسر اتنا بھی نہیں کر سکتا کہ اس سانحے پر اظہار خیال کرے؟ ان کے بقول دھونی کو پہلگام واقعے پر کم از کم ایک بیان یا ٹویٹ تو دینا چاہیے تھا۔

مزید پڑھیں: پہلگام واقعے کے بعد شیکھر دھون نے بھی شاہد آفریدی کے خلاف بیان دے دیا

یاد رہے کہ مہندرا سنگھ دھونی کو نومبر 2011 میں اس وقت کے آرمی چیف جنرل وی کے سنگھ نے اعزازی طور پر بھارتی فوج میں لیفٹیننٹ کرنل کا رینک عطا کیا تھا۔ یہ اعزاز انہیں کرکٹ میں بھارت کے لیے غیر معمولی خدمات انجام دینے پر دیا گیا تھا، خاص طور پر 2007 کے ٹی20 ورلڈکپ میں فتح کے بعد۔

واضح رہے مہندرا سنگھ دھونی واحد کپتان ہیں جن کی قیادت میں بھارت نے 2007 میں ٹی20 ورلڈکپ، 2011 میں ورلڈکپ، 2013 میں چیمپئینز ٹرافی جیتنے کا اعزاز حاصل کیا۔