لاہور(این این آئی)پاکستان کرکٹ بورڈ کے میڈیکل پینل کی جانب سے پاکستان کے جارح مزاج نوجوان اوپنر صائم ایوب کو مکمل فٹ قرار دے دیا گیا۔میڈیکل پینل کی جانب سے گرین سگنل ملنے کے بعد صائم ایوب اور وکٹ کیپر بیٹر محمد حارث پشاور زلمی کو جوائن کرلیں گے، زلمی کے بیشتر کھلاڑیوں کی جانب سے ٹیم منیجمنٹ کو رپورٹ کیا جا چکا ہے۔
اسلام آباد کلب میں پشاور زلمی کے کھلاڑی پہلا پریکٹس سیشن کریں گے جبکہ بابر اعظم نیوزی لینڈ سے واپسی پر ٹیم کو جوائن کریں گے۔صائم ٹخنے کی انجری کے باعث قومی ٹیم سے باہر تھے تاہم لندن میں اپنا ری ہیب مکمل کرنے کے بعد انہوں نے عید کراچی میں اپنی فیملی کے ساتھ منائی۔اس سے قبل نوجوان اوپنر صائم سے ایک پروگرام میں میزبان نے سوال کیا تھا کہ کونسا ایسا انٹرنیشنل کرکٹر ہے جسے دیکھ کر آپ کہتے تھے کہ مجھے ان کے جیسے کھیلنا ہے؟جواب میں صائم نے کہا کہ سب سے زیادہ متاثر تب ہوتا تھا جب پاکستان ٹیم کو کھیلتا دیکھتا تھا، کھلاڑی پاکستان کے بیگز لے کر جارہے ہوتے تھے تو سوچتا تھا کہ کاش میں بھی ایسے ہی بیگ لے کر گھر جاؤں اس میں پاکستان کا ہیلمٹ رکھوں۔میزبان کے اصرار پر صائم نے کہا کہ سعید انور، برائن لارا، سچن ٹنڈولکر، ایڈم گلکرسٹ پسند ہیں، سعید انور سے ملنے کا اتفاق ہوا ہے۔
