لاہور (این این آئی)پاکستان کرکٹ بورڈ کی جانب سے پاکستان سپر لیگ (پی ایس ایل) 10 کا ترانہ ہر دلعزیز گلوکار علی ظفر کی آواز میں جلد جاری کیا جائے گا جس پر ملتان سلطانز کے مالک علی ترین نے مایوسی کا اظہار کر دیا۔فوٹو اینڈ ویڈیو شیئرنگ پلیٹ فارم انسٹاگرام پر ملتان سلطانز کے مالک نے اپنے اعتراض کا اظہار کھل کر کر دیا۔علی ترین نے پی ایس ایل کو تنقید کا نشانہ بناتے ہوئے انسٹا اسٹوری شیئر کی ہے۔انہوں نے اپنی مایوسی کا اظہار کرتے ہوئے سوال کیا کہ پی ایس ایل نئے ٹیلنٹ کو سامنے لانے کے بجائے ایک ہی فنکار پر انحصار کیوں کرتا ہے؟ملتان سلطانز کے مالک نے لکھا ہے کہ پاکستان کے پاس بہت سارے حیرت انگیز فنکار ہیں، پھر بھی تقریباً آدھے سے زیادہ ترانے ایک ہی درمیانی عمر کے گلوکار کو دے دیے گئے، اس کے باوجود کہ فرنچائزز کو فنکار کے حوالے سے خدشات ہیں۔

علی ترین نے لکھا کہ وہ اسے اب تک کا سب سے بڑا پی ایس ایل قرار دے رہے ہیں لیکن پھر بھی انہی آوازوں کو ری سائیکل کر کے پیش کر رہے ہیں۔خیال رہے کہ پی سی بی نے پی ایس ایل 10 کے آفیشل ترانے کے گلوکار کا اعلان ایک پوسٹر شیئر کر کے کر دیا ہے، جس کے مطابق اس سال بھی نوجوانوں کے پسندیدہ گلوکار علی ظفر پی ایس ایل کے گانے میں آواز کا جادو جگائیں گے۔علی ظفر اس سے قبل بھی متعدد بار پی ایس ایل کا ترانہ گا چکے ہیں۔گزشتہ سیزن میں بھی پی ایس ایل اینتھم ‘کْھل کے کھیل’ میں انہوں نے ہی اپنی آواز کا جادو جگایا تھا۔واضح رہے کہ پاکستان سپر لیگ سیزن 10 کا ا?غاز 11 اپریل سے ہو گا، یہ ایونٹ 18 مئی تک کراچی، لاہور، ملتان اور راولپنڈی میں منعقد ہو گا۔