اسلام آباد (نیوز ڈیسک) ذرا تصور کریں کہ ایک شرارتی بچہ مچھلی پکڑنے کے شوق میں کشتی لے کر سمندر کی وسعتوں میں نکل جائے اور وہاں بھٹک کر گم ہو جائے، تو کیا ہوگا؟ چین میں ایسا ہی ایک حیران کن واقعہ پیش آیا، جہاں 10 سالہ بچہ چپکے سے کشتی میں بیٹھ کر شکار کے لیے سمندر میں روانہ ہوا اور 24 گھنٹے تک راستہ بھٹکتا رہا۔ حیرت انگیز طور پر وہ زندہ بچ نکلا اور ایک بحری جہاز کے عملے نے اسے بچا لیا۔

یہ واقعہ چینی صوبے ہینان میں پیش آیا، جہاں سیاحوں کی ایک کشتی نے سمندر میں تنہا بھٹکتے اس بچے کو دیکھ کر فوری طور پر ریسکیو کیا۔ بچہ، جس کا نام لیانگ بتایا جا رہا ہے، کا کہنا تھا کہ وہ شکار کے لیے نکلا تھا لیکن واپسی کا راستہ بھول گیا۔ اس کا گھر ساحل سے تقریباً 30 کلومیٹر دور واقع تھا، اور اس کا محفوظ رہنا کسی معجزے سے کم نہیں سمجھا جا رہا۔

لیانگ کے مطابق، اس نے 24 گھنٹوں کے دوران کئی گزرنے والے جہازوں کو مدد کے لیے آوازیں دیں، لیکن کسی نے اس کی پکار نہیں سنی۔ دوسری طرف، اس کے والدین پوری رات اسے تلاش کرتے رہے اور مقامی پولیس سے بھی مدد طلب کی۔ والدین کا کہنا تھا کہ لیانگ گاؤں کے قریب سے ایک کشتی چرا کر شکار کے لیے نکل گیا تھا۔

یہ شرارتی بچہ پہلے بھی اپنی غیر معمولی حرکتوں کی وجہ سے گاؤں میں مشہور ہے۔ وہ اکثر کھمبوں اور درختوں پر چڑھ جاتا ہے، اور ایک مرتبہ تو مقامی مندر میں آگ لگانے کی واردات میں بھی ملوث پایا گیا تھا۔ اس کے والدین صفائی کا کام کرتے ہیں، اور اس کی مسلسل شرارتوں کے باعث اسے خصوصی پولیس واچ لسٹ میں بھی شامل کیا گیا ہے تاکہ وہ مزید پریشانیاں نہ کھڑی کرے۔