لاہور (نیوز ڈیسک)بھارت میں کسانوں نے ”ریل روکو“ احتجاج فوری طور پر ختم کرنے کا اعلان کیا ہے جس کے بعد پاکستان اور بھارت کے درمیان چلنے والی سمجھوتہ ایکسپریس جلد بحال ہوجائے گی۔ جنگ رپورٹر خالد محمود خالد کے مطابق سات روز سے جاری اس احتجاج کے نتیجہ میں 1100ٹرینیں بند ہو جانے سے بھارتی ریلوے کو کروڑوں روپے کا نقصان ہو چکا ہے جبکہ انبالہ اور فیروزپور ڈویڑن میں ریلوے لائینز کے ساتھ کسانوں کے دھرنے کی وجہ سے سمجھوتہ ایکسپریس سروس معطل ہونے سے پاکستان اور بھارت کے کئی مسافر ایک دوسرے کے ملکوں میں پھنس کر رہ گئے تھے جبکہ ویزہ کی معیاد ختم ہونے والے مسافروں کیلئے ٹرانسپورٹ کے دیگر ذرائع کا انتظام کر کے مسافروں کو ان کے وطن روانہ کیا گیا۔ اسلام آباد میں بھارتی ہائی کمیشن کے ترجمان نے سمجھوتہ ایکسپریس کی وقتی طور پر معطلی کی وضاحت کرتے ہوئے کہا ہے کہ اگر سمجھوتہ ایکسپریس معمول کے مطابق روانہ کی جاتی تو کسان پاکستانی مسافروں اور ٹرین پر حملہ کر سکتے تھے جس سے پاکستان اور بھارت کے تعلقات پر بہت نقصان دہ اثرات پڑ سکتے تھے