ملتان۔۔۔۔ انسداد دہشت گردی کی خصوصی عدالت نے بم کی جھوٹی اطلاعات دینے والے ملزم کو 26 سال قید اور ایک لاکھ روپے جرمانے کی سزا سنادی۔ملتان میں انسداد دہشتگردی کی خصوصی عدالت میں رانا یوسف نامی ملزم کو پیش کیا گیا، سماعت کے دوران وکیل استغاثہ نے موقف اختیار کیا تھا کہ پولیس کو بذریعہ فون نامعلوم شخص کی جانب سے 28 جولائی 2014ء کو حسین ا گاہی چوک جبکہ اگلے دن شاہ شمس پارک میں بم کی اطلاع ملی، دونوں اطلاعات ملنے پر پولیس، بم ڈسپوزل اسکواڈ، ریسکیو سمیت دیگر اداروں کے اہلکار موقع پر پہنچ گئے اور علاقے خالی کروا کر مکمل سرچ آپریشن کیا تاہم دونوں ہی اطلاعات جھوٹی ثابت ہوئی۔ جھوٹی اطلاعات پر پولیس نے تحقیق کے ذریعے ملزم کو گرفتار کرلیا۔ فریقین کا موقف سننے کے بعد عدالت نے ملزم رانا یوسف کو مجموعی طور پر 26 سال قید اور ایک لاکھ روپے جرمانہ ادا کرنے کی سزا سنادی۔