اسلام آباد (این این آئی)آئندہ چوبیس گھنٹوں کے دوران اسلام آباد، بالائی خیبر پختونخوا، خطہ پوٹھوہار، شمال مشرقی بالائی پنجاب ،گلگت بلتستان اور کشمیر میں آندھی ،جھکڑ چلنے اور گرج چمک کے ساتھ بارش جبکہ چند مقامات پر موسلادھار بارش لرز ڑالہ باری کا امکان ہے۔ اس دوران زیریں خیبر پختونخوا، شمالی بلوچستان اور گلگت بلتستان میں مطلع جزوی ابر آلود رہنے کے علاوہ چند مقامات پر آندھی جھکڑ چلنے اور گرج چمک کے ساتھ بارش کی توقع ہے تاہم ملک کے دیگر علاقوں میں موسم گرم اورخشک رہے گا۔

محکمہ موسمیات کے مطابق گذشتہ 24 گھنٹوں کے دوران ملک کے بیشتر علاقوں میں موسم گرم اور خشک رہا جبکہ اسلام آباد، خطہ پوٹھوہار اور ناروال میں چند مقامات پر تیز ہوائوں اور گرج چمک کے ساتھ بارش ہوئی۔ سب سے زیادہ بارش اسلام آباد میں (زیروپوائنٹ 27، سید پور 10)، راولپنڈی (شمس آباد 24، چکلالہ ائرپورٹ 5) اور نارووال میں 7 ملی میٹر بارش ریکارڈ کی گئی۔ جمعہ کو ریکارڈ کئے گئے زیادہ سے زیادہ درجہ حرارت کی رپورٹ کے مطابق سبی میں درجہ حرارت 41، دادو اور تر بت میں 40 ڈگری سینٹی گریڈ ریکارڈ کیا گیا۔