لاہور( این این آئی)گزشتہ ہفتے قاتلانہ حملے میں شدید زخمی ہونے والی سابقہ اداکارہ و ماڈل زینب جمیل نے بیٹی کے ساتھ ہونے والی گفتگو شیئر کی ہے۔زینب جمیل نے صبح ہسپتال سے اپنے انسٹاگرام اکائونٹ پر ایک نئی ویڈیو اور بیٹی کے ہمراہ تصویر شیئر کی ۔اداکارہ نے اپنی ایک پوسٹ میں بتایا ہے کہ میری بیٹی میری طاقت ہے، مجھے ان لمحات سے نفرت ہو رہی ہے جب میری بیٹی کو معلوم ہوگا کہ مجھ پر قاتلانہ حملہ اس کے والد نے کروایا ہے۔

اداکارہ نے مزید بتایا ہے کہ ان کی بیٹی نے ان سے صرف اتنا پوچھا لیکن کیوں ماما، میں بابا سے کبھی بات نہیں کروں گی، اس نے میری ممی کو تکلیف دی۔اپ لوڈ کی گئی ویڈیو میں اداکارہ نے پنجاب حکومت کا شکریہ ادا کیا ہے۔زینب جمیل کا کہنا ہے کہ ان سے بات نہیں کی جاتی کیونکہ ان کا چہرہ گولی لگنے کے سبب زخمی ہے مگر وہ یہ ویڈیو بنانا چاہتی تھیں۔زینب جمیل نے عوام کا شکریہ ادا کرتے ہوئے انہیں اپنا حوصلہ قرار دیا ہے اور صحتیابی کے لیے دعائوں کی اپیل کی ۔