لاہور(این این آئی)پاکستان تحریک انصاف رہنما چوہدری پرویز الٰہی کو جیل سے رہا کردیا گیا۔ چوہدری پرویز الٰہی کوٹ لکھپت جیل سے ظہور الٰہی پیلس پہنچ گئے۔تفصیلات کے مطابق منگل کولاہور ہائیکورٹ نے چوہدری پرویز الٰہی کی رہائی کا حکم دیا تھا، ہائیکورٹ نے پنجاب اسمبلی بھرتی کیس میں پرویز الہی کی درخواست ضمانت منظور کی تھی۔لاہور ہائیکورٹ کے جسٹس سلطان تنویر احمد نے چوہدری پرویز الٰہی کی پنجاب اسمبلی میں بھرتیوں کے مقدمے میں درخواست ضمانت پر محفوظ فیصلہ سنایا۔

پرویز الٰہی کے وکیل عامر سعید راں کا موقف تھا کہ پرویز الٰہی کا ان بھرتیوں سے کوئی تعلق نہیں تھا، اینٹی کرپشن نے مقدمہ 2سال کی تاخیر سے درج کیا۔ انہوں نے کسی امیدوار سے بھرتی کیلیے رقم وصول نہیں کی۔ اینٹی کرپشن نے پرویز الٰہی کے گھر سے جعلی ریکوری ڈالی۔ اینٹی کرپشن کے وکیل کا کہنا تھا کہ پرویز الٰہی پر مقدمہ قانون کے مطابق درج کیا۔ عدالت نے پرویز الٰہی کی درخواست ضمانت منظور کرلی۔ پرویزالٰہی کو 25اکتوبر 2023 کو گرفتار کیا گیا تھا۔