لاہور( این این آئی)لاہور ڈویلپمنٹ اتھارٹی نے مون سون سیزن میں تعمیراتی سائٹس پر سخت حفاظتی اقدامات کا حکم دیدیا۔ایل ڈی اے نے 15 اگست تک کھدائی پر مکمل پابندی عائد کردی۔

عدم تعمیل پرایف آئی آر، پراپرٹی سیل، بلڈنگ پلان منسوخی اور بھاری جرمانہ ہوگا۔ تمام متعلقہ قوانین پر سختی سے عمل درآمد یقینی بنانے کی ہدایت کردی گئی۔تمام تعمیراتی سائٹس پرشورنگ اور ریٹیننگ وال کے انتظامات یقینی بنانے کی ہدایت کردی گئی، تہہ خانوں کی تعمیرسمیت تمام سائٹس پر سٹرکچرل استحکام اورحفاظتی اقدامات لازمی قرار دیدی گئی۔ تمام آرکیٹیکٹس، سٹرکچرانجینئرز اور ریذیڈنٹ انجینئرز کو3 روز میں سیفٹی سرٹیفکیٹ جمع کرانے کا حکم دیدیا گیا۔ناکافی حفاظتی انتظامات سے کسی بھی جانی و مالی نقصان کی ذمہ داری مالک، بلڈر اور متعلقہ انجینئر پر ہوگی۔

سیکرٹری ہائوسنگ نور الامین مینگل نے کہا کہ ہمسایہ املاک، عوامی انفراسٹرکچراور انسانی جانوں کا تحفظ یقینی بنایا جائے، عدم تعمیل پرایف آئی آر، پراپرٹی سیل، بلڈنگ پلان منسوخی اور بھاری جرمانہ ہوگا۔