کراچی(این این آئی) اداکارہ درفشاں سلیم نے کہا ہے کہ ایسی فلموں میں کام نہیں کرسکتی جس میں خواتین کو قابل اعتراض انداز میں پیش کیا جائے۔میڈیا رپورٹ کے مطابق ایک انٹرویو میں اداکارہ درفشاں سلیم نے بتایا کہ ڈراموں سے قبل ایک فلم سائن کی تھی تاہم بعد میں فلم میں کام نہیں کیا، جب فلم ریلیز ہوئی تو اس بات پر شکر ادا کیا کہ فلم کا حصہ نہیں بنی۔

اداکارہ نے کہا کہ میں خود کتھک ڈانسر ہوں اور فلموں میں گانوں اور ڈانس کیخلاف نہیں لیکن آئٹم سانگز نہیں ہونے چاہئیں۔ انہوں نے کہا کہ فلموں میں اپنے سماج کی کہانیوں کو پیش کرنا چاہئے۔انہوں نے بتایا کہ ڈراموں میں کام حاصل کرنے کیلئے زیادہ محنت نہیں کرنا پڑی، میرے والد پروڈکشن ہائوس چلاتے ہیں، اداکار کاشف محمود والد کے دوست ہیں انہوں نے آڈیشن میں مدد دی۔ آڈیشن کے ایک ماہ بعد ڈرامے میں کام کی پیشکش ہوئی اور سال 2020ء میں ڈراما دلربا سے شوبز میں کیرئیر کا آغاز کیا۔