اسلام آباد (این این آئی)اسلام آباد ہائی کورٹ نے ایون فیلڈ ریفرنس میں نواز شریف کی بریت کا مختصر تحریری فیصلہ جاری کرتے ہوئے کہاہے کہ نیب کے پاس نواز شریف کے خلاف کیس ثابت کرنے کے لیے کوئی دستاویزی شواہد موجود نہیں ۔ جمعہ کو جاری تحریری فیصلہ میں کہاگیاکہ دوران سماعت نیب پراسیکیوٹر نے مریم نواز اور کیپٹن ر صفدر کیس کے فیصلے پر توجہ دلائی ، مریم نواز اور کیپٹن ر صفدر کے بریت کے فیصلے میں اس عدالت نے آبزرویشن دی تھی ۔
تحریری فیصلے کے مطابق نیب کے پاس نواز شریف کے خلاف کیس ثابت کرنے کے لیے کوئی دستاویزی شواہد موجود نہیں ۔ تحریری فیصلے کے مطابق مریم نواز اور کیپٹن ر صفدر کی بریت کے فیصلے کہیں بھی چیلنج نہیں کیا ، عدالت نواز شریف کی سزا کے خلاف اپیل منظور اور بری کرنے کا حکم دیتی ہے ،بریت کی وجوہات کا تفصیلی فیصلہ بعد میں جاری کیا جائے گا۔اسلام آباد ہائی کورٹ کے دو رکنی بینچ نے دو صفحات پر مشتمل تحریری فیصلہ جاری کردیا۔
