کراچی(این این آئی)بحریہ ٹائون کراچی سے متعلق عدالتی احکامات پر سندھ حکومت متحرک ہوگئی ہے، بحریہ ٹائون مجموعی طور پر کتنی زمین پر قائم ہے اور زمین کی ملکیت کے حوالے سے تحقیقات کیلیے کمیٹی قائم کردی گئی۔سندھ حکومت کی جانب سے کمشنر کراچی کی سربراہی میں کمیٹی بنادی گئی ہے جو سات روز میں رپورٹ تیار کرے گی۔
تحقیقات میں نشاندہی کی جائے گی کہ بحریہ ٹائون کی زمین کا اصل سائز(رقبہ)کیا ہے اور بحریہ ٹائون نے کن شرائط پر نجی افراد سے زمینیں خریدی ہیں۔کمشنر کراچی کی سربراہی میں قائم کمیٹی گوگل میپ ، نقشوں اور تصویروں کے ساتھ مکمل رپورٹ پیش کرے گی۔محکمہ سروسز اینڈ جنرل ایڈمنسٹریشن نے نوٹیفکیشن بھی جاری کردیا ہے جس کے تحت کمیٹی اس بات کی تحقیقات کرے گی کہ بحریہ ٹائون کی کتنی زمین خریدی گئی اور کتنی پرقبضہ ہوا۔
