اسلام آباد(این این آئی)صدر مملکت عارف علوی نے انشورنس کمپنی کو صارف کو45لاکھ روپے بمع 8سال منافع ادا کرنے کا حکم دے دیا۔تفصیلات کے مطابق صدرنے وفاقی انشورنس محتسب کے فیصلے کیخلاف انشورنس کمپنی کی اپیل مسترد کر دی۔کراچی کے شہری امتیاز احمد نے اپنی گاڑی کیلئے 45لاکھ روپے کی انشورنس پالیسی لی، شہری نے گاڑی چھن جانے پر انشورنس کمپنی سے 45لاکھ کی رقم ادا کرنے کا کہا لیکن کمپنی نے گاڑی کی قیمت زیادہ بتانے کا بہانہ بنا کر انشورنس کلیم ادا کرنے سے انکار کر دیا۔

شہری نے وفاقی انشورنس محتسب سے رجوع کیا جس نے شہری کے حق میں فیصلہ دیا،انشورنس محتسب کے فیصلے کے خلاف انشورنس کمپنی نے صدر مملکت کو اپیل دائر کی۔صدر مملکت نے انشورنس کمپنی کی اپیل کو مسترد کرتے ہوئے کہا کہ کمپنی نے معاملہ 8سال لٹکائے رکھا،شہری کی انشورنس کی رقم پر منافع کمایا، انشورنس کمپنی شہری کو45لاکھ کلیم کی رقم اور 8سال کا منافع بھی ادا کرے۔