کراچی(این این آئی)صدر ٹائون کی یوسی 4سے تحریک انصاف کے نو منتخب وائس چیئرمین عبد الرحمان کو حلف لینے کے بعد گرفتار کر لیا گیا،مجموعی طور پر نو مئی کے واقعات کے الزام میں پی ٹی آئی کے چار کامیاب امیدواروں کو حراست میں لے لیا گیا ہے۔

پولیس کے مطابق گرفتار کیے جانے والا وائس چیئرمین 9مئی کے واقعات میں مطلوب تھا۔رہنما تحریک انصاف ارسلان تاج کے مطابق ابھی تھوڑی دیر پہلے ہمارے چنیسر ٹائون یوسی 5 کے منتخب چیئرمین شاہد انصاری اور وائس چیئرمین راو وسیم کو جو حلف لینے گئے تھے باہر سے ہی پولیس گرفتار کر کے لے گئی ہے۔تحریک انصاف کے رہنمائوں کی گرفتاری پر جماعت اسلامی کے نمائندوں کی ریٹرننگ افسر سے تکرار بھی ہوئی۔ نمائندوں نے کہا کہ آپ کے ہوتے ہوئے یہ گرفتاری ہوئی ہے۔رکن سندھ اسمبلی راجہ اظہر نے کہا کہ آج ایک یوسی چیئرمین اور دو وائس چیئرمین کو گرفتار کیا گیا، کورنگی یوسی پانچ کے چیئرمین امجد کو پہلے ہی گرفتار کرکے سکھر جیل میں بھیج دیا گیا ہے۔الیکشن کمیشن کو گرفتاریوں پر خط لکھیں گے۔ضلع جنوبی صدر ٹائون پی ٹی آئی یوسی چھ وسیم شیرازی کو بھی حلف برداری کے بعد گرفتار کیا گیا جبکہ یوسی 8 کے چیئرمین سلمان خان حلف برداری کی تقریب کے بعد موقع سے فرار ہوئے لیکن پولیس نے تعاقب کرکے سلمان خان کو گرفتار کرلیا۔پی ٹی آئی چیئرمین رفیق آفریدی ، علی رضا سمیت دیگر بلدیاتی نمائندے موقع سے فرار ہوگئے۔