اسلام آباد (نیوز ڈیسک)گزشتہ برس 3جی اور4جی کی نیلامی کے بعد پاکستان ٹیکنالوجی کے ایک نئے دور میں شامل ہو گیا ہے اور ملک میں موجود تقریباً تمام سیلولر کمپنیوں نے گزشتہ برس ہی 3جی اور4جی کے لائسنس حاصل کر لیے تھے لیکن اب بھی پی ٹی سی ایل سمیت کئی دیگر کمپنیوں کے پاس یہ لائسنس نہیں ہے۔ان کمپنیوں کو انٹرنیٹ کی تیزترین رفتار سے ہمکنار کرنے کے لیے حکومت ایک بار پھر 3جی اور4جی کے لائسنسوں کی نیلامی پر غور کر رہی ہے اور امکان ظاہر کیا جا رہا ہے کہ یہ نیلامی جلد کر دی جائے گی۔وفاقی وزیرمملکت برائے انفارمیشن ٹیکنالوجی انوشہ رحمان نے ترکی کے سفیر بابر گرگن سے ملاقات کی جس میں انہوں نے 3جی اور4جی لائسنسوں کی دوبارہ نیلامی کا عندیہ دیا۔ انوشہ رحمان نے ترک سفیر کو گزشتہ برس ہونے والے نیلامی کے متعلق بھی بریفنگ دی اور بتایا کہ ”اکثر ٹیلی کام کمپنیاں لائسنس خرید چکی ہیں جس سے انٹرنیٹ صارفین کی تعداد میں خاطرخواہ اضافہ ہوا ہے۔ اب باقی ماندہ کمپنیاں بھی لائسنس حاصل کرنا چاہتی ہیں تاکہ ان کے صارفین بھی اس سے مستفید ہو سکیں۔اسی ڈیمانڈ کو مدنظر رکھتے ہوئے ہم نے ایک بار پھر نیلامی کا ارادہ کیا ہے۔“
انوشہ رحمان نے کہا کہ”پاکستان ٹیلی کام کمپنیوں کے لیے ایک منافع بخش مارکیٹ ہے اور ترک ٹیلی کام آپریٹرز کے لیے یہ بہترین موقع ہے کہ وہ نئی نیلامی سے فائدہ اٹھائیں اور پاکستان میں سرمایہ کاری کریں۔“ انہوں نے بتایا کہ ”حکومت اس بار 850میگا ہرٹز سپیکٹرم کے لائسنس نیلامی میں پیش کرے گی۔“ واضح رہے کہ پی ٹی اے کی طرف سے 2015ئ کے اوائل میں ہی 3جی اور4جی کی دوبارہ نیلامی کے لیے اشتہارات جاری کیے جا چکے ہیں۔