پشاورہائیکورٹ، اثاثے ظاہر نہ کرنے کیخلاف درخواست پر عمران خان کو نوٹس جاری کردیا گیا

پشاور (این این آئی) اثاثے ظاہر نہ کرنے کے خلاف اے این پی کی درخواست پر پشاور ہائیکورٹ نے عمران خان اور ایف بی آر کو نوٹس جاری کردیا۔

عوامی نیشنل پارٹی کے صوبائی صدر ایمل ولی خان نے پشاور ہائیکورٹ میں پی ٹی آئی چیئرمین عمران خان کی نااہلی کیلئے درخواست دائر کی۔چیف جسٹس پشاور ہائی کورٹ مسرت ہلالی اور جسٹس شکیل احمد نے درخواست پر سماعت کی۔درخواست گزار کے وکیل نے عدالت میں مؤقف پیش کیا کہ عمران خان نے توشہ خانہ تحائف غیر قانونی فروخت کئے، جب کہ حاصل رقم بھی اثاثوں میں ظاہر نہیں کی۔وکیل درخواست گزار نے مؤقف اپنایا کہ عمران خان نے اپنے کاغذات نامزدگی میں اہلیہ کی 70 لاکھ مالیت کی جیولری بھی ظاہر نہیں کی، اثاثے چھپانا الیکشن ایکٹ 2017 کی خلاف ورزی ہے، عمران خان کو پارٹی کی قیادت سے ہٹانے کے ساتھ ساتھ نااہل کیا جائے۔پشاور ہائیکورٹ نے عمران خان اور ایف بی آر کو نوٹس جاری کرکے آئندہ سماعت پر جواب طلب کرلیا۔