اسلام آباد (نیوزڈ یسک)طبی دنیا میں ایک غیر معمولی اور حیران کن واقعہ بھارت کی ریاست گجرات میں پیش آیا، جہاں ڈاکٹروں نے ایک خاتون کی پلکوں سے تقریباً 250 زندہ جوئیں نکالیں۔تفصیلات کے مطابق، سورت کی 66 سالہ خاتون گیتابین گزشتہ ڈیڑھ ماہ سے آنکھوں میں شدید خارش، سوجن اور درد کی شکایت میں مبتلا تھیں۔ ان کی آنکھیں مسلسل سرخ رہتی تھیں اور تکلیف کے باعث نیند بھی پوری نہیں ہو رہی تھی۔

گیتابین نے آخرکار امریلی ضلع کے ساورکنڈلا ہسپتال کے آنکھوں کے شعبے سے رجوع کیا، جہاں ماہر چشم ڈاکٹر مرگانک پٹیل نے معائنہ کیا۔ معائنے کے دوران معلوم ہوا کہ ان کی پلکوں میں صرف ایک دو نہیں بلکہ سیکڑوں زندہ جوئیں موجود ہیں۔ڈاکٹروں کے مطابق، چونکہ جوئیں روشنی سے حساس ہوتی ہیں اور ان کا علاج محدود آلات کے ساتھ ممکن تھا، اس لیے انجکشن دیے بغیر نہایت احتیاط سے جوئیں نکالنے کا عمل شروع کیا گیا۔یہ پورا آپریشن دو گھنٹے تک جاری رہا، جس کے دوران تمام جوئیں صاف کی گئیں اور خاتون کی حالت میں نمایاں بہتری آئی۔