اسلام آباد (نیوز ڈ یسک)پاکستان کے متعدد نجی نیوز ٹی وی چینلز کی نشریات مبینہ طور پر ہیک کر لی گئیں،

جن پر اسرائیلی خفیہ ایجنسی موساد کے حق میں پیغامات نشر کیے گئے۔ذرائع کے مطابق ہیکنگ کے اس واقعے کے ساتھ ساتھ کئی پاکستانی نیوز ویب سائٹس پر گوگل اشتہارات کے ذریعے بھی موساد کی حمایت میں مہم چلائی گئی۔ اطلاعات ہیں کہ پاکستان سمیت کم از کم 19 ممالک کی مختلف ویب سائٹس کو آن لائن اشتہاری مہم کے ذریعے ہدف بنایا گیا۔رپورٹس کے مطابق پاکستان میں اس پرو موساد مہم کا رخ زیادہ تر میڈیا ہاؤسز اور خبروں سے متعلق ویب سائٹس کی جانب تھا۔ نشریات میں مداخلت اور آن لائن اشتہارات کے ذریعے چلائی جانے والی مہم کے بعد متعلقہ اداروں نے معاملے کا نوٹس لیتے ہوئے تحقیقات شروع کر دی ہیں۔