اسلام آباد (این این آئی)سابق وزیر اعظم عمران خان کی گرفتاری کے بعد آل پاکستان پرائیویٹ اسکولز فیڈریشن کے اعلان پر ملک بھر میں پرائیویٹ اسکول بند رہے جس کے بعد کئی امتحانات بھی ملتوی کر دیئے گئے ۔

تفصیلات کے مطابق سابق وزیراعظم عمران خان کی گرفتاری کے بعد جلائو گھیرائو اور احتجاج کے پیش نظر خیبر پختونخوا میں بدھ سے ہفتے تک اسکولوں سمیت تمام تعلیمی ادارے بند رکھنے کا فیصلہ کیا گیا ہے۔اس کے علاوہ صوبے میں نویں اور دسویں جماعت کے امتحانات بھی 13 مئی تک ملتوی کردیے گئے ہیں۔دوسری جانب لاہور کے تمام سرکاری اسکول بھی بند رہے جبکہ راولپنڈی تعلیمی بورڈ کے تحت نویں جماعت کا پرچہ ملتوی کردیا گیا ۔ تعلیمی بورڈز کے چیئرمینوں کی کمیٹی نے پنجاب بھر میں امتحانات ملتوی کرنے کا فیصلہ کیا ۔دوسری جانب صورتحال کے پیش نظر برٹش کونسل نے بھی 10 مئی کو ہونے والے امتحانات منسوخ کردیے ، فیڈرل بورڈ کے زیر اہتمام آج مطالعہ پاکستان کا پرچہ منسوخ کردیا گیا ادھر کراچی ،حیدرآباد اور شہیدبے نظیرآباد میں میٹرک کے امتحانات معمول کے مطابق ہوئے علاوہ ازیں کوئٹہ کی سردار بہادر خان ویمن یونیورسٹی بند رہی