ممبئی (این این آئی)بھارت کی ریاست مدھیا پردیش کے ایک مندر میں 1988سے کام کرنیوالے 2مسلمانوں کو وہاں سے نکالنے کے احکامات جاری کردیئے گئے ہیں ۔بھارتی میڈیا کے مطابق ریاستی حکومت نے احکامات جاری کیے ہیں کہ اب سے مسلمان ملازمین مندر کی مینجمنٹ کمیٹی میں کام نہیں کرسکتے۔رپورٹس کے مطابق مندر کی کمیٹی کو احکامات پر عمل کر کے رپورٹ جمع کرانے کا بھی کہا گیا ہے۔بھارتی میڈیا کے مطابق ان احکامات پر عمل کے بعد مندر میں 1988سے کام کرنے والے 2 مسلمان ملازمین کی نوکری ختم ہو جائے گی۔رپورٹس کے مطابق ریاست کا قانون کہتا ہے کہ کسی بھی شخص کو مذہب کی بنیاد پر نوکر ی سے نہیں نکالا جاسکتا۔تاہم بھارتی میڈیا کے مطابق مسلمان ملازمین کو نوکری سے نکالنے کے احکامات انتہاپسند جماعتوں کے دباو میں آکر جاری کیے گئے ہیں۔

موضوعات:2مسلمان ملازمین