جدہ(نیوزڈیسک)مسجد الحرام میں ایک کرین کے حادثے کے نتیجے میں زخمی ہونے والے حجاج کرام نے ہسپتال میں دوران علاج شاہ سلمان بن عبدالعزیز کی آمد اور خیریت دریافت کرنے پر حیرت کا اظہارکرتے ہوئے کہاہے کہ جب شاہ سلمان ان سے ملنے آئے تو انہیں یقین نہیں آ رہا تھا کہ خادم الحرمین الشریفین جیسی عظیم المرتبت شخصیت معمولی نوعیت کے لوگوں کی عیادت کےلئے چل کر ان کے پاس آئےگی۔عرب ٹی وی کے مطابق شاہ سلمان بن عبدالعزیز نے مکہ مکرمہ کے النور ہسپتال میں زیرعلاج کرین حادثے کے زخمیوں کی عیادت کی ۔اس موقع پر انہوں نے ایران سے آئی ایک حاجیہ سے بھی اس کی مزاج پرسی کی، معمر ایرانی خاتون محقی بیوک نے اس موقع پر گفتگو کرتے ہوئے کہا کہ مجھے بتایا گیا کہ شاہ سلمان بن عبدالعزیز میری عیادت کو تشریف لائے ہیں میرے سمیت دوسرے زخمیوں میں سے کسی کو یقین نہیں آرہا تھا کہ خادم الحرمین الشریفین ہم جیسے معمولی لوگوں کی عیادت کو تشریف لائینگے۔ شاہ سلمان آئے انہوں نے فردا فردا تمام زخمیوں کی مزاج پرسی کی، ان کی خیریت دریافت کرنے کے بعد ان کی جلد صحت یابی بھی دعا کی اور ساتھ ہی یقین دلایا کہ حکومت اسی سال ان کا حج مکمل کرائےگی۔