اسلام آباد (نیوز ڈیسک) وزیراعظم پاکستان عمران خان نے انفارمیشن ٹیکنالوجی کے فروغ سے متعلق اجلاس کی صدارت کرتے ہوئے فائیو جی کی فائبرائزیشن کے لئے لائحہ عمل مرتب کرنے کے لئے ایک ہفتہ کی ڈیڈ لائن دے دی، بڑے شہروں میں فائبرائزیشن کے ذریعہ موبائل فون کے ٹاوروں کو جوڑا جائے گا۔وزیراعظم کی زیرصدارت ہونے والے اجلاس میں مشیر تجارت عبد الرزاق داؤد،وزیر اعظم کی معاون خصوصی برائے اطلاعات ونشریات ڈاکٹر فردوس عاشق اعوان، آئی ٹی اینڈ ٹیلی کام کے شریک چیئرمین ڈاکٹر عطا الرحمان، سیکرٹری برائے انفارمیشن ٹکنالوجی اور کابینہ ارکان نے شرکت کی۔ کراچی میں وزیر اعظم
کی نیشنل ٹاسک فورس برائے سائنس اور ٹیکنالوجی کے سربراہ پروفیسر ڈاکٹر عطاالرحمن نے کہا کہ حکومت پاکستان مصنوعی ذہانت،بِگ ڈیٹا،سائبرسیکیورٹی اور اس سے منسلک دیگر ٹیکنالوجیزپر پچاس بلین خرچ کرے گا۔حکومتی دفاتر میں ملکی سطح پر تیارہونے والے سافٹ ویئرز کے استعمال کو فروغ دیا جائے گاتاکہ ملک میں آئی ٹی کی صنعت کو مستحکم کرنے میں مددمل سکے۔صدر پاکستان اور وزیر اعظم پاکستان اس شعبہ میں خصوصی دلچسپی لے رہے ہیں۔حکومتی سطح پر یہ فیصلہ کیا گیا ہے کہ مصنوعی ذہانت کے مراکز کو ملک کے کونے کونے میں پھیلایاجائے۔بین الاقوامی رپورٹس کے مطابق اس دہائی کی ایجادات سے 100 کھرب ڈالرز حاصل ہونگے۔ ان تمام میں مصنوعی ذہانت،کلاؤڈ کمپیوٹنگ،ایڈوانسٹڈمیٹریلز،انڈسٹریل بائیوٹیکنالوجی،انٹرنیٹ آف تھینگز،انرجی اسٹوریج سسٹم اور دیگر شامل ہیں۔پاکستانی جامعات اور سافٹ ویئر ہاوسزاور انڈسٹریز کو چاہیئے کہ وہ مارکیٹ کی ضروریات کو مد نظر رکھتے ہوئے کام کریں تاکہ ملک کو زیادہ سے زیادہ بزنس حاصل ہو اور وہ اپنے زرائع مبادلہ میں خاطر خواہ اضافہ کرسکیں۔ان خیالات کا اظہارانہوں نے جامعہ کراچی کے شعبہ کمپیوٹرسائنس کےزیر اہتمام انٹرنیشنل سینٹر فارکیمیکل اینڈ بائیولوجیکل سائنسز جامعہ کراچی کے پروفیسر ڈاکٹر سلیم الزماں صدیقی آڈیٹوریم میں منعقدہ دوسری دوروزہ بین الاقوامی کانفرنس بعنوان: ”انفارمیشن سائنس اینڈ کمیونیکشن ٹیکنالوجی“ کی افتتاحی تقریب سے خطاب کرتے ہوئے کیا۔ڈاکٹر عطاالرحمن نے سنگاپور کی مثال دیتے ہوئے کہا کہ اس کی معیشت ہیومن ریسورسز اور ہائی ٹیک مینوفیکچرنگ / ایکسپورٹ پر مبنی ہے،پانچ ملین کی آبادی والا ملک جس کا کل رقبہ 1865 اسکوائرکلومیٹر ہے اور اس کی ایکسپورٹ 330 بلین ڈالرز ہیں۔