اسلام آباد (نیوز ڈ یسک ) بنگلادیش کی معروف ماڈل اور اداکارہ رِدھیکا رِدھی دارالحکومت ڈھاکا کے بشوندھرا رہائشی علاقے میں ہفتے کی صبح اپنی رہائش گاہ پر بے ہوشی کی حالت میں پائی گئیں،
بعد ازاں اسپتال میں ڈاکٹروں نے ان کی موت کی تصدیق کردی۔پولیس کے مطابق رِدھی کو صبح تقریباً 6 بجے ان کے گھر سے تشویشناک حالت میں نکال کر کرمیٹولا جنرل اسپتال منتقل کیا گیا، جہاں طبی عملے نے انہیں مردہ قرار دے دیا۔بھٹارا پولیس اسٹیشن کے انچارج مظہر الاسلام نے واقعے کی تصدیق کرتے ہوئے بتایا کہ اطلاع ملنے کے بعد پولیس ٹیم اسپتال پہنچی، جہاں اداکارہ کی لاش موجود تھی۔ ان کے مطابق رِدھی کی والدہ سمیت دیگر اہل خانہ بھی پولیس اسٹیشن میں موجود ہیں۔پولیس کا کہنا ہے کہ ابتدائی شواہد سے واقعہ خودکشی کا شبہ ظاہر ہوتا ہے، تاہم حتمی طور پر کچھ کہنا قبل از وقت ہے اور مختلف پہلوؤں سے تفتیش جاری ہے۔ اہل خانہ کی جانب سے دی جانے والی درخواست کی روشنی میں قانونی کارروائی بھی کی جا رہی ہے۔خاندانی ذرائع کے مطابق رِدھیکا رِدھی ایک شخص کے ساتھ تعلق میں تھیں۔
پولیس کے مطابق واقعے سے قبل ہفتے کی صبح دونوں کے درمیان ویڈیو کال پر مبینہ طور پر تلخ کلامی ہوئی تھی، جس کے بعد اداکارہ نے انتہائی قدم اٹھایا۔پولیس حکام کا کہنا ہے کہ واقعے کی مکمل وجوہات جاننے اور تمام حالات و واقعات کا جائزہ لینے کے لیے تحقیقات جاری ہیں۔
