اسلام آباد (مانیٹرنگ ڈیسک)جے یو آئی (ف) کے رہنما شاہ اویس نورانی نے دعویٰ کیا کہ عمران خان خود ان ہاؤس تبدیلی کے لیے نام بھی دے چکے ہیں اوریہ بات ایک ہفتہ پرانی ہے۔نجی ٹی وی پروگرام میں گفتگو کرتے ہوئے انہوں نے کہا کہ میں آپ کو چار روزپہلے کی ایک بات بتا دوں اور وہ یہ ہے کہ عمران خان ان ہاؤس تبدیلی کے لیے بھی نام تجویز کر چکے ہیں۔ وہ خود کہہ رہے ہیں کہ تبدیلی لے آئیں گے کیونکہ حالات اتنے بگڑ گئے ہیں۔ حکومت اس وقت دباؤ کا شکار ہے، ان ہاؤس تبدیلی کے لیے
جن کا نام آیا ہے اس کی مخالفت ایک نا اہل شخص نے بھی کی ہے۔آپ خود تلاش کریں ، ہو سکتا ہے کہ وہ وزیر خارجہ ہی ہوں۔ جس پر پروگرام کے میزبان نے کہا کہ عمران خان خود اپنی تبدیلی نہیں کروائیں گے یہ بات ذہن میں رکھیں جس پر شاہ اویس نورانی نے کہا کہ عمران خان اگر خود آیا ہوتا تو وہ اپنی تبدیلی نہ کرواتا ، عمران خان خود تو نہیں آیا۔ انہوں نے کہا کہ یہ کوئی افواہ نہیں ہے بلکہ یہ آپس میں ڈسکشن ہوئی ہے۔ یہ سب سچ ہے ایسا ہوا ہے آپ خود دیکھیں گے۔بہر حال مارچ چلے گا اور بھرپور چلے گا حکومت خود بخود چلی جائے گی۔یاد رہے کہ جے یو آئی ف نے 31اکتوبر کو اسلام آباد میں آزادی مارچ کرنے کا اعلان کررکھاہے ۔