واشنگٹن(این این آئی)شام کے لیے امریکی صدر کے خصوصی ایلچی جیمز جیفری نے کہاہے کہ مشرق وسطی میں امریکا کا سعودی عرب سے زیادہ کوئی بہتر شراکت دار نہیں ہے۔غیرملکی خبررساں ادار ے کے مطابق ایک کانفرنس میں شرکت کے دوران ان کا کہنا تھا کہ مشرق وسطی میں دو اہم ترین معاملات میں سعودی عرب سے زیادہ بہتر ہمارا کوئی ساتھی نہیں ہے۔ جیفری نے واضح کیا کہ یہ دو معاملات خطّے میں ایران کی مہم جوئی کو روکنا اور انسداد دہشت گردی ہے۔ امریکی ایلچی کے مطابق خطّے میں

ہم جو کچھ کر رہے ہیں یہ سعودی عرب کے بغیر ممکن نہ تھا۔امریکی ایلچی نے بتایا کہ شام میں ٹرمپ انتظامیہ کی ترجیحات ، داعش کی شکست، ملک سے تمام ایرانی فورسز کا انخلاء اور امن عمل کا آغاز ہے۔اس سے قبل بدھ کے روز جیمز جیفری نے باور کرایا تھا کہ واشنگٹن شام سے ایرانی عسکری فورسز کا خروج چاہتا ہے۔ ان کے مطابق ایرانی عسکری وجود کا باقی رہنا خطّے میں امریکا کے شراکت داروں کے لیے خطرہ ثابت ہو گا۔ ان خیالات کا اظہار انہوں نےامریکی وزارت خارجہ میں صحافیوں سے بات کرتے کیا۔

موضوعات:جیمز جیفری