ممبئی(شوبز ڈیسک) بالی ووڈ کے چلبلے اداکار رنویر سنگھ کی نئی فلم ’’83‘‘ کی ریلیز کی تاریخ کا اعلان کردیا گیا۔بھارت سمیت دنیا بھر میں اپنی اداکاری سے مداحوں کے دلوں میں گھر کر جانے والے چلبلے اداکار رنویر سنگھ کو فلم ’پدماوت‘ نے شہرت کی بلندیوں پر پہنچا دیا ہے فلم میں رنویر کی اداکاری سے نہ صرف مداح بلکہ ہدایتکار بھی دنگ رہ گئے ہیں یہی وجہ ہے کہ رنویر ہدایتکاروں کی پہلی ترجیح بھی بن گئے اور اب تک متعدد فلمیں سائن کرچکے ہیں جن میں سے ایک سابق بھارتی کرکٹر کپل دیو کی زندگی پر بننے والی فلم ’83‘ بھی ہے جس کی ریلیز کی تاریخ کا اعلان کردیا گیا ہے۔
معروف بھارتی تجزیہ کار ترن ادارش کی جانب سے سماجی رابطے کی ویب سائٹ ٹوئٹر پر ایک ٹوئٹ میں بریکنگ نیوز دیتے ہوئے بتایا گیا کہ کبیر خان کی ہدایتکاری میں بننے والی رنویر سنگھ کی فلم ’83‘ 10 اپریل 2020 میں سنیما گھروں کی زینت بنے گی۔فلم ’83‘ کی کہانی 1983 کے آئی سی سی ولڈ کپ ٹرافی کی فاتح ٹیم بھارت کے گرد گھومتی ہے جس میں بھارتی ٹیم کے کپتان کپل دیو تھے جب کہ فلم میں رنویر سنگھ سابق کرکٹر کا کردار ادا کریں گے۔واضح رہے کہ اداکار رنویر سنگھ زویا اختر کی ہدایتکاری میں بننے والی فلم ’گلی بوائے‘ کی شوٹنگ سے فارغ ہونے کے بعد روہت شیٹھی کی فلم ’سمبا‘ کی شوٹنگ میں مصروف ہیں۔
