اسلام آباد (نیوز ڈیسک) چیک باؤنس کیس میں مقررہ رقم جمع نہ کرانے پر بھارتی سپریم کورٹ نے بالی ووڈ اداکار راج پال یادیو کو سخت تنبیہ کردی۔

بھارتی میڈیا رپورٹس کے مطابق عدالت نے راج پال یادیو کو 2 کروڑ بھارتی روپے جمع کرانے کے لیے دو ہفتوں کی مہلت دی تھی، تاہم مقررہ مدت گزرنے کے باوجود اداکار کی جانب سے رقم جمع نہیں کرائی گئی۔سماعت کے دوران اداکار کے وکیل نے شکایت کنندہ کے حوالے سے موقف اختیار کیا کہ وہ مالی طور پر مستحق یا غریب نہیں ہیں۔ وکیل کے اس بیان پر جسٹس جوئے مالیا باگچی نے سخت برہمی کا اظہار کیا۔جج نے ریمارکس دیے کہ وکیل کو یہ سمجھنا چاہیے کہ عدالت میں کب اور کیا بات کرنی ہے، جبکہ انہوں نے سخت لہجے میں کہا کہ ’’آپ کی جگہ جیل میں ہے۔‘‘عدالت نے کارروائی کے دوران راج پال یادیو کو منگل تک 2 کروڑ بھارتی روپے جمع کرانے کی ہدایت جاری کردی۔

یہ معاملہ 2010 میں ایک فلم کی تیاری کے لیے حاصل کی گئی 5 کروڑ بھارتی روپے کی مالی معاونت سے متعلق ہے۔ بعد ازاں اس رقم کے حوالے سے جاری کیے گئے چیکس باؤنس ہونے کے بعد تنازع عدالت تک پہنچا۔