اسلام آباد (نیوز ڈیسک)14 سالہ بھارتی کرکٹر ویبھوو سوریاونشی نے انڈین پریمیئر لیگ ( آئی پی ایل) میں میچ کھیل کر نئی تاریخ رقم کر دی۔ 19اپریل بروز ہفتہ کو آئی پی ایل 2025 میں راجستھان رائلز اور لکھنؤ سپر جائنٹس کی ٹیمیں مدمقابل تھیں۔یہ میچ ریاست راجستھان کے دارالحکومت جے پور کے ساوائی مان سنگھ اسٹیڈیم میں کیھلا گیا۔
اس میچ میں سب کی توجہ کا مرکز 14 سال اور 23 دن کے نوجوان کرکٹر ویبھوو سوریا ونشی کا راجستھان کی فائنل الیون میں شامل ہونا تھا۔لکھنؤ سپر جائنٹس نے راجستھان کے خلاف پہلے بیٹنگ کرتے ہوئے مقررہ 20 اوورز میں 5 وکٹوں پر 180 رنز اسکو رکیے۔ پلیئنگ الیون میں شامل ہونے کے ساتھ ہی 14 سالہ ویبھوو سوریاونشی آئی پی ایل میچ کھیلنے والے سب سے کم عمر ترین کھلاڑی بن گئے۔اس سے قبل آئی پی ایل میں سب سے کم عمر کھلاڑی کا اعزاز اسپنر پریاس رائے برمن کے پاس تھاجنھوں نے 2019 میں رائل چیلنجرز بنگلور کے لیے 16 سال 154 دن کی عمر میں صرف ایک میچ کھیلا تھا۔سوریاونشی نے 14 سال اور 23 دن کی عمر میں آئی پی ایل ڈیبیو کیا ہے۔گزشتہ ماہ 14 سال کے ہونے والے ویبھوو سوریاونشی نے 181 رنز کے ہدف کے تعاقب میں راجستھان کی جانب سے اوپننگ کی اور آئی پی ایل میں اپنی پہلی ہی گیند پر چکھا لگا کر اپنی آمد کا اعلان کیا۔
سوریاونشی نے اننگز کے پہلے ہی اوور میں فاسٹ بولر شاردل ٹھاکر کو اپنی پہلی ہی گیند پر چھکا لگایا۔ اس میچ میں انہوں نے محض 20 گیندوں پر 34 رنز بنائے۔سوریاونشی کی اس اننگز میں 3 چھکے اور2 چوکے شامل تھے۔181 رنز کے ہدف کے جواب میں راجستھان کی ٹیم صرف 2 رنز سے میچ ہار گئی لیکن سوریاونشی نے اپنے شاندار ڈیبیو سے سب کے دل جیت لیے۔ویبھوو 27 مارچ 2011 کو ریاست بہار کےگاؤں تاجپور میں پیدا ہوئے۔ انہوں نے اپنے کرکٹ کا سفر صرف 4 سال کی عمر میں شروع کیا اور پھر 9 سال کی عمر میں ان کے والد نے انہیں قریبی قصبےکی ایک کرکٹ اکیڈمی میں داخل کروایا۔ویبھوو نے جنوری 2024 میں صرف 13 سال کی عمر میں ریاست بہار کے لیے رانجی ٹرافی ایلیٹ گروپ بی کے مقابلے میں ممبئی کے خلاف فرسٹ کلاس ڈیبیو کیا۔
ویبھوو سوریا ونشی نے یوتھ ٹیسٹ میں چنئی کے ایم اے چدمبرم اسٹیڈیم میں بھارت کی انڈر19 ٹیم کی نمائندگی کرتے ہوئے آسٹریلیا کی انڈر19 ٹیم کے خلاف شاندار سنچری بھی بنائی۔نوجوان کھلاڑی نے 62 گیندوں پر 104 رنز کی شاندار اننگز کھیلی اور یوتھ ٹیسٹ فارمیٹ میں سنچری اسکور کرنے والے سب سے کم عمر کھلاڑی بن گئے۔اس کے علاوہ سوریا ونشی یوتھ ٹیسٹ فارمیٹ میں دوسری تیز ترین سنچری بنانے والے کھلاڑی اور اس فارمیٹ میں سب سے تیز سنچری بنانے والے بھارتی کھلاڑی بھی ہیں۔
