اسلام آباد (نیوز ڈیسک) نومبر 2024 میں سابق بھارتی کرکٹر اور کوچ سنجے بانگر کی بیٹی انایا بانگر، جو جنس کی تبدیلی کے بعد لڑکے سے لڑکی بنی ہیں، نے انسٹاگرام پر کئی حیران کن انکشافات کر دیے۔
انایا، جن کا سابقہ نام اریان تھا، نے فوٹو اینڈ ویڈیو شیئرنگ پلیٹ فارم پر بتایا کہ انہیں متعدد بھارتی کرکٹرز کی جانب سے غیر اخلاقی پیغامات اور نامناسب تصاویر موصول ہوئیں۔ ان کا کہنا تھا کہ جنس کی تبدیلی کے بعد کچھ کرکٹرز نے انہیں ہراساں کرنے کی بھی کوشش کی۔
انایا نے کہا کہ بچپن سے ہی وہ خود کو ایک لڑکی محسوس کرتی تھیں۔ “جب میں 8 یا 9 سال کی تھی تو ماں کے کپڑے پہن کر آئینے کے سامنے خود کو دیکھتی تھی، لیکن والد کی پہچان اور ان کی کرکٹنگ شہرت کے باعث اپنی اصل شناخت کو چھپانے پر مجبور تھی۔”
انہوں نے مزید بتایا کہ ایک کھلاڑی نے انہیں عوامی مقام پر برا بھلا کہا اور پھر تصاویر مانگنے لگا، جبکہ ایک سینیئر کرکٹر نے ایسا قدم اٹھانے کی کوشش کی جس کا ذکر بھی ان کے لیے مشکل ہے۔
یہ بھی قابل ذکر ہے کہ انایا، اپنی تبدیلی سے قبل بھارت کے ابھرتے ہوئے کھلاڑیوں جیسے سرفراز خان، یشسوی جیسوال اور مشیر خان کے ساتھ کرکٹ کھیل چکی ہیں۔
دوسری جانب، انٹرنیشنل کرکٹ کونسل (آئی سی سی) نے 2023 میں خواتین کرکٹ میں شامل ہونے والی ٹرانس جینڈر کھلاڑیوں کے خلاف سخت پالیسی اپنائی تھی، جس کے تحت ان پر کھیلنے کی پابندی عائد کی گئی تھی۔
خیال رہے کہ اریان نے 22 سال بطور مرد زندگی گزاری اور 2023 میں ہارمون تھراپی کا آغاز کیا۔ تقریباً 11 ماہ کی تھراپی کے بعد وہ مکمل طور پر ایک ٹرانس جینڈر خاتون کے طور پر سامنے آئیں۔
