اسلام آباد (نیوز ڈیسک) آئی سی سی نے سر گارفیلڈ سوبرز مینز کرکٹر آف دی ایئر 2024 کا اعلان کر دیابین الاقوامی کرکٹ کونسل (آئی سی سی) نے سال 2024 کے بہترین مرد کرکٹر کے اعزاز، سر گارفیلڈ سوبرز مینز کرکٹر آف دی ایئر کا اعلان کر دیا۔ اس ایوارڈ کے لیے بھارت کے تیز گیند باز جسپریت بمراہ، آسٹریلیا کے ٹریوس ہیڈ، انگلینڈ کے جو روٹ اور ہیری بروک کو نامزد کیا گیا تھا۔آئی سی سی کے مطابق بھارتی فاسٹ بولر جسپریت بمراہ کو 2024 کا سر گارفیلڈ سوبرز مینز کرکٹر آف دی ایئر قرار دیا گیا ہے۔ وہ اس اعزاز کو حاصل کرنے والے بھارت کے پہلے فاسٹ بولر بن گئے ہیں۔
جسپریت بمراہ نے سال 2024 میں شاندار کارکردگی کا مظاہرہ کیا اور بھارت کو ٹی ٹوئنٹی ورلڈ کپ جتوانے میں نمایاں کردار ادا کیا۔ وہ گزشتہ سال ٹیسٹ کرکٹ میں سب سے زیادہ وکٹیں لینے والے گیند باز بھی رہے۔ بمراہ نے 2024 میں کھیلے گئے 13 ٹیسٹ میچوں میں مجموعی طور پر 71 وکٹیں حاصل کیں۔یہ اعزاز جیتنے والے وہ بھارت کے پانچویں کرکٹر بن گئے ہیں۔ ان سے قبل راہول ڈریوڈ، سچن ٹنڈولکر، روی چندرن ایشون اور ویرات کوہلی بھی یہ ایوارڈ حاصل کر چکے ہیں۔ایوارڈ جیتنے کے بعد جسپریت بمراہ نے اپنی خوشی کا اظہار کرتے ہوئے کہا کہ سر گارفیلڈ سوبرز ایوارڈ حاصل کرنا میرے لیے ایک بڑا اعزاز ہے۔
میں اس پذیرائی پر شکر گزار ہوں۔ 2024 میرے لیے ایک یادگار سال رہا، جس میں ہم نے ٹی ٹوئنٹی ورلڈ کپ جیتا اور دیگر فارمیٹس میں بھی شاندار کارکردگی دکھائی۔یہ بھی قابل ذکر ہے کہ جسپریت بمراہ نے 2024 میں آئی سی سی ٹیسٹ کرکٹر آف دی ایئر کا ایوارڈ بھی اپنے نام کیا تھا۔
