اسلام آباد (نیوز ڈ یسک)کراچی کے علاقے ڈیفنس میں ایک مصروف سڑک پر نصب ڈیجیٹل ایڈورٹائزمنٹ اسکرینز پر نازیبا مواد نشر ہونے کے واقعے نے شہریوں میں شدید تشویش اور غم و غصے کو جنم دے دیا ہے۔
ذرائع کے مطابق ڈی ایچ اے کے خیابانِ اتحاد پر لگائی گئی ایس ایم ڈی اسکرینز کو نامعلوم عناصر نے ہیک کر کے کچھ دیر کے لیے غیر اخلاقی ویڈیو چلا دی۔ اس واقعے کے بعد علاقے میں بے چینی پھیل گئی اور لوگوں نے فوری طور پر اس پر ردِعمل ظاہر کیا۔واقعہ عبدالستار ایونیو کے قریب پیش آیا، جہاں بڑی ڈیجیٹل اسکرینز پر متنازع مواد دیکھ کر شہریوں نے موبائل فون سے ویڈیوز بنا کر سوشل میڈیا پر اپ لوڈ کر دیں، جو تیزی سے وائرل ہو گئیں۔اطلاع موصول ہوتے ہی متعلقہ حکام حرکت میں آئے اور متاثرہ اسکرینز کو فوری طور پر بند کر دیا گیا تاکہ مزید غیر مناسب مواد نشر نہ ہو سکے۔حکام کے مطابق حفاظتی اقدام کے طور پر ڈی ایچ اے کی دیگر اہم سڑکوں کے علاوہ شاہراہِ فیصل اور کارساز کے علاقے میں نصب کئی ڈیجیٹل اسکرینز کو بھی عارضی طور پر بند کر دیا گیا ہے۔ اس کے ساتھ ساتھ تمام سسٹمز کا سیکیورٹی آڈٹ بھی شروع کر دیا گیا ہے۔اس واقعے کی تحقیقات کے لیے نیشنل سائبر کرائم انویسٹی گیشن ایجنسی اور سائبر کرائم یونٹ نے مشترکہ طور پر کارروائی کا آغاز کر دیا ہے۔
حکام کا کہنا ہے کہ ذمہ دار افراد تک پہنچنے کے لیے تکنیکی شواہد، ڈیٹا لاگز اور دیگر ڈیجیٹل ریکارڈز کا باریک بینی سے جائزہ لیا جا رہا ہے تاکہ ملوث عناصر کو قانون کے مطابق سزا دی جا سکے۔
